«Yuventus» yarim himoyachisi Pol Pogbaning oilaviy mojarolari borasida yangi tafsilotlar ma’lum bo‘ldi.

Ma’lum bo‘lishicha, futbolchining akasi Matias Pogba shantaj yo‘li bilan undan 13 million yevroga yaqin pul undirmoqchi.

Bir necha kun avval Matias ijtimoiy tarmoqda video murojaat qoldirgan. Unda Matias Pol Pogba, uning agenti Rafael Pimenti va Kilian Mbappega oid katta shov-shuvlarga sabab bo‘ladigan video borligini ma’lum qilgan.

Prokuratura «uyushgan guruh tomonidan shantaj qilishga urinish» bo‘yicha ish qo‘zg‘agan. Get French Football News nashri xabariga ko‘ra, 29 yoshli futbolchini joriy yilning mart oyida bolalikdagi do‘stlari va ikki nafar qurollangan shaxs Parijdagi uyga aldov yo‘li bilan chaqirgan va Poldan 13 million yevro talab qilgan. Talonchilar Pogbaga u professional futbol faoliyatini boshlagandan buyon ularga yordam berishni to‘xtatganini aytgan.

Pogbadan «ko‘rsatilgan xizmatlar» uchun pul talab qilingan — go‘yoki ular Polni 13 yil davomida yashirincha qo‘riqlab kelgan. «Yuventus» futbolchisining ta’kidlashicha, bundan keyin u akasi Matias va bolalikdagi do‘stlari tomonidan tahdidga uchray boshlagan.

Fransuzning qo‘shimcha qilishicha, Parijdagi voqeadan so‘ng u tovlamachilarni yana bir necha bor, shu jumladan, 2022 yilning iyul oyida Turindagi «Yuventus» bazasida ham ko‘rgan. O‘shanda akasi Matias ham ushbu guruhga kirishini bilib qolgan. Pol «keksa sinyora» yuristiga murojaat qilgan, u esa ishni polisiyaga oshirgan.

Pogba polisiya xodimiga doimo bolalikdagi do‘stlariga yordam berib kelganini, yanvar oyida do‘stlaridan birini bank kartasidan 200 ming yevro o‘g‘irlaganlikda ayblab, Manchesterdagi uyidan haydab chiqarishga majbur bo‘lganini aytib bergan.

Tergov natijalari Mbappe ushbu voqeaga tovlamachilarning Pogba haqidagi tarqatgan ma’lumotlari sabab qo‘shilib qolganini ko‘rsatadi. Go‘yoki «Yuventus» xavbeki shamandan Kilianni afsun qilib qo‘yishini so‘ragan. Futbolchining o‘zi bu ayblovni rad etgan.