Яқинлашиб келаётган 12-турда мухлисларни Тошкент дербиси кутиб турибди.
Унда охирги йилларда мамлакатнинг етакчиларига айланиб қолган икки жамоа - "Бунёдкор" ҳамда "Пахтакор" тўқнаш келади. Жорий мавсумнинг ҳозирги қисмигача ҳар икки клуб бир қанча муҳим очколардан айрилиб улгурди. Шу сабабли ҳам бу галги ўйиннинг аҳамияти янада ошган. Жамоалар беллашувга дисквалификация қилинган футболчиларсиз етиб келишлари мумкин. Агар Ғузорда қизил карточка олган Иракли Климиашвилини ҳисобга қўшмасак, албатта. Унинг неча ўйинга четлатилгани эртага маълум бўлади.
Олий лига баҳслари доирасида жамоалар 10 бор майдонга тушишган. Уларнинг 7тасида дуранг натижа қайд этилган бўлса, қолган 3 учрашувда "Бунёдкор"нинг қўли баланд келган. Тўп киритиш борасида устунлик "қалдирғочлар" тарафида, 9:6. "Жар" стадионидаги охирги уч баҳсда мезбонлар 2:1 ҳисобида зафар қучишган.
Ёшлар таркиблари ўйини 25 июнь, душанба куни соат 18:00да "Жар" стадиони кичик майдонида бошланади. Мазкур баҳсга фан клуб аъзоларини таклиф этамиз. Чунки ёшларни қўллаб туриш билан бирга асосий жамоалар баҳсига тайёргарлик ҳам ёшлар баҳсида қилиб олинади. 26 июнь куни эса соат 19:00да "Жар" стадионида асосий таркиблар ўйинига старт берилади. Учрашувни Равшан Эрматов бошчилигидаги ҳакамлар гуруҳи бошқариб боради.
“Бунёдкор” – “Пахтакор”
Ҳакамлар: Равшан Эрматов (Тошкент), Абдуҳамидилло Расулов (Тошкент), Руслан Серазитдинов (Тошкент), Шерзод Қосимов (Тошкент).
Назоратчи: Алишер Абдуллаев (Тошкент).
