Италиялик журналист Фабрицио Романонинг хабар беришича, "Челси"нинг бельгиялик ҳужумчиси Миши Батшуайи "Ноттингем Форест"га ўтишга яқин турибди.
Форварднинг "кўклар" билан шартномаси 2022/2023 йилги мавсум охиригача амал қилади. Бельгиялик футболчини Transfermarkt портали 10 млн еврога баҳолаган.
28 ёшли Батшуайи 2016 йилнинг ёзида 39 миллион евро эвазига "Марсел"дан "Челси"га ўтганди. У "аристократлар" сафида жами 77та ўйинда майдонга тушиб, 25та гол урган ва 6та голга ассистентлик қилган. "Челси"га ўтгандан сўнг, Батшуайи бир неча бор ижарага берилди: Дортмунднинг "Боруссия", "Валенсия", Лондоннинг "Кристал Пэлас" жамоаларида ижара асосида ўйнаган. Мишининг сўнгги жамоаси Туркиянинг “Бешиктош” жамоаси бўлиб, у ерда 42 та ўйинда 14 та гол урди ва 5 та голли узатмани амалга оширди.
Миши 2015 йилдан бери Бельгия терма жамоасида ўйнаб келмоқда, терма жамоа билан биргаликда 2018 йилги Жаҳон чемпионатининг бронза медали совриндорига айланди.
