"Челси" яна бир бор "Аякс"га мексикалик ярим ҳимоячи Эдсон Альваресни сотиб олиш учун мурожаат қилиши мумкин. Бу ҳақда нидерландиялик журналист Майк Вервей ўзининг подкастида хабар берди.
Инсайдер хабарига кўра, ҳар икки клуб ҳам бўлажак қишки трансфер ойнасида мексикалик футболчининг "аристократлар" лагерига ўтишини расмийлаштириш бўйича музокараларга киришишга тайёр.
Аниқлик киритилишича, ярим ҳимоячининг ўзи унинг трансфери шу ёзда амалга ошмаганидан жуда хафа бўлган, аммо энди у бор эътиборини "Аякс"да ўйнашга қаратишга тайёр.
Эслатиб ўтамиз, трансфер ойнасининг сўнгги соатларида "Челси" ярим ҳимоя чизиғида фаол равишда кучайтирувчилар қидираётган эди. Альваресдан ташқари ПСВ ҳимоячиси Иброҳим Сангаренинг номи ҳам тилга олинганди, аммо якунда Лондон клуби швейцариялик ярим ҳимоячи Денис Закариянинг "Ювентус"дан ижарага олингани ҳақида маълумот берди.
