"Chelsi" yana bir bor "Ayaks"ga meksikalik yarim himoyachi Edson Alvaresni sotib olish uchun murojaat qilishi mumkin. Bu haqda niderlandiyalik jurnalist Mayk Vervey o‘zining podkastida xabar berdi.
Insayder xabariga ko‘ra, har ikki klub ham bo‘lajak qishki transfer oynasida meksikalik futbolchining "aristokratlar" lageriga o‘tishini rasmiylashtirish bo‘yicha muzokaralarga kirishishga tayyor.
Aniqlik kiritilishicha, yarim himoyachining o‘zi uning transferi shu yozda amalga oshmaganidan juda xafa bo‘lgan, ammo endi u bor e’tiborini "Ayaks"da o‘ynashga qaratishga tayyor.
Eslatib o‘tamiz, transfer oynasining so‘nggi soatlarida "Chelsi" yarim himoya chizig‘ida faol ravishda kuchaytiruvchilar qidirayotgan edi. Alvaresdan tashqari PSV himoyachisi Ibrohim Sangarening nomi ham tilga olingandi, ammo yakunda London klubi shveysariyalik yarim himoyachi Denis Zakariyaning "Yuventus"dan ijaraga olingani haqida ma’lumot berdi.
