"Арсенал" трансфер ойнаси ёпилишидан бироз олдин "Барселона"дан Ферран Торресни сотиб олмоқчи эди.
Лондон клуби каталонияликларга 22 ёшли вингер учун 30 миллион евро таклиф қилди.
"Барса" футболчини "Манчестер Сити"дан атиги 8 ой олдин 55 миллион еврога сотиб олганига қарамай, "кўк-анорранглилар" раҳбарияти "канонирлар" таклифини кўриб чиқишга тайёр эди.
Бироқ, "Барса" бош мураббийи Хави Торреснинг сотилишига тўсқинлик қилди ва уни дахлсиз деб атади - айниқса Пьер-Эмерик Обамеянгнинг "Челси"га кетишини ҳисобга олиб.
Натижада "Барселона" "Арсенал" таклифидан воз кечди. Лондонликлар бошқа таклиф билан чиқишмади.
Ферран бу мавсумда "Барса" учун Ла Лигада бир марта асосий таркибда, икки марта захирадан майдонга тушди.
