«Андижон» ҳамда АГМК ўртасидаги ўйиндан сўнг андижонликлар сафида тўлиқ ўйин ўтказган иқтидорли футболчи Абдураҳмон Комилов ўз фикрларини билдирди.
«Ўйин қийин бўлишини билгандик. Шунга қараб яхши тайёргарлик кўрдик. АГМК жамоасига муносиб қаршилик кўрсатдик. Уларга қарши ҳар бир жабҳада қаршилик кўрсатишга улгурдик. Айрим хатоларимиз эвазига мағлуб бўлдик. Ютқазганимизга қарамай, мухлисларимиз биз билан бирга бўлишди. Бизни қўллаб-қувватлаб туришгани учун уларга раҳмат. Кейинги учрашувларда ғалаба қозониб уларни хурсанд қиламиз, албатта.
Бизга АГМК билан учрашувда биринчи навбатда омад етишмади. Хатолардан тўғри хулоса чиқарамиз.
Албатта, АГМК биз кутган ўйинни кўрсатди. Рақиб маҳоратли футболчилардан ташкил топган. Қолаверса, Суперлигада совринли ўринлар учун курашяпти», - дейди Комилов.
