Италия А Сериясининг 5-турида “Рома” “Удинезе”дан жавобсиз тўртта гол ўтказиб юбориб, йирик ҳисобда мағлуб бўлди. “Рома”нинг португалиялик мураббийи Жозе Моуриньо ўйин натижаларини шарҳлар экан, одатдагидек, ҳакамни нохуш гап билан эслади. Моуриньо жамоалари бунгача А Сериянинг бир ўйинида тўртта гол фарқи билан мағлуб бўлишмаган.

"Тўрт марта 0:1 дан кўра бир марта 0:4 ҳисобида мағлуб бўлишни афзал кўраман. Албатта, бундай мағлубиятдан ўтиш қийин, айниқса мухлисларимиз учун, лекин пайшанба куни янги ўйин бўлади. Бу сафар ҳакамлик борасида ҳам омадимиз келмади, 0:1 ҳисобида пеналти тепишимиз керак эди, гарчи одатда 0:4 ҳисобида ютқазсангиз, ҳакамлар устидан шикоят қилишнинг маъноси йўқ", - дея Моуриньонинг сўзларидан иқтибос келтиради La Gazzetta Dello Sport.