Ўзбекистон футбол ассоциациясининг махсус инспекция бўлими ҳамкор ташкилотлар билан биргаликда тотализатор ва келишилган ўйинларга доир ҳолатларни ҳамда барча алоқадорларни аниқлаш юзасидан текширув ишларини давом эттирмоқда.

Айни пайтга келиб инспекция томонидан бир қанча тасдиқловчи материаллар аниқланиб, тегишли шахслар кўрсатмалари олиняпти. Бу борада халқаро ташкилотларга сўровлар юборилди. Ҳозирда тўпланган маълумотларга оид далил-исботлар ўрганиб чиқилмоқда ва шундан сўнг материаллар тегишли қўмитага топширилади.

Афсуски, футбол ичидаги баъзи нопок инсонларнинг шахсий манфаати йўлида амалга ошираётган бундай хатти-ҳаракатлари футболимиз обрўсига салбий таъсир қилмоқда. Шу сабабли, ЎФА барча айбдорлар аниқланиб, уларга кескин чора кўрилишини маълум қилади.

Жараён ва қарорлар эълон қилиб борилади. Ўз навбатида, ушбу мавзу юзасидан холис ва аниқ маълумотлар асосида чиқишлар қилаётган ОАВ ҳамда блогерларга миннатдорчилик билдирамиз ва уларнинг футболга бефарқ эсмаслигини қадрлаймиз. Аксинча, баъзи ҳолларда учраётган, фактларга асосланмай, мавзуни чуқур ўрганмай, тахмин ва фараздан иборат ёндашув билан жамоатчиликни чалғитишдан тийилишга чақириб қоламиз.

Бу ҳолатлар мухлислар ишончини қозониш ва футболимиз ривожи йўлида амалга оширилаётган кенг кўламли ишларга тўсқинлик қилмаслиги учун ЎФА раҳбарияти бор куч ва имкониятини ишга солади.