Марко Асенсио "Мальорка"га қарши ўйинда Анчелотти уни майдонга туширмаганидан норози эди.

Мадриднинг “Реал” клуби вингери Ла Лиганинг 5-туридан ўрин олган ўйинни барча қисмини (4:1) захирада ўтказди. Бу ўйинда мадридликлар бош мураббийи Карло Анчелотти 5 та алмаштиришдан 4 тасини амалга оширди.

Футболчи чигал ёзди машқларини бажариб бўлганидан сўнг майдонга тушмаслигини билгач машғулот либосини олд қисмини йиртиб ташлади, захира ўриндиғи ёнидаги сув идишни тепди ва ўйиннинг қолган қисмини норози кайфиятда кузатди.

Ла Лиганинг жорий мавсумида 26 ёшли футболчи Ла Лиганинг фақат битта ўйинида қатнашди - 2-турда "Сельта" билан ўйинда (4:1) майдонда 8 дақиқа ўтказди.

Ўйиндан сўнг Анчелотти футболчининг ҳис-туйғуларига муносабат билдирди: “Асенсионинг ўйнамаганидан жаҳли чиқдими? Мен унинг фикрига қўшиламан, шунинг учун буни инобатга оламан".

Ярим ҳимоячининг Мадрид клуби билан шартномаси жорий мавсум охиригача ҳисобланган.