Теннис бўйича «Улкан тож» туркумига кирувчи US Open финали 11 сентябрь, якшанба куни ўтказилди.

Финалда Испания вакили Карлос Алкарас норвегиялик Каспер Руудга қарши кортга тушди. Тўрт сет давом этган баҳс Алкараснинг фойдасига ҳал бўлди.

Алкарас фаолиятида илк бор «Улкан тож» совринини ютиб олди ва бу натижани қайд этган Рафаэль Надаль «Ролан Гаррос—2005»ни ютган даврдан кейинги энг ёш теннисчига айланди.

Ушбу ғалаба эвазига Алкарас дунё рейтингида биринчи ўринга чиқиб олди. 19 ёш-у 4 ойлик Карлос рейтинг пешқадамига айланган тарихдаги энг ёш теннисчига айланди. У Ллейтон Ҳюиттнинг рекордини (20 ёш-у 9 ойлик) деярли 1,5 ёшга янгилади.

Алкарас фаолиятидаги олтинчи ва жорий мавсумдаги бешинчи совринга эга чиқди. Теннисчи ушбу мавсумда кортда 7,4 миллион доллар ишлаб топди ва бу борада етакчи бўлиб турибди.

US Open, финал
Карлос Алкарас (Испания) – Каспер Рууд (Норвегия)
6:4 | 2:6 | 7:6 | 6:3