Ўзбекистон Олий лигасининг 13¬-туридан ўрин олган «Динамо» ҳамда «Локомотив» жамоалари ўртасидаги баҳс ҳозиргина ўз ниҳоясига етди. Унда тошкентлик футболчиларнинг 0:1 ҳисобида қўли баланд келди. Сайтимизни сичковлик билан кузатиб бораётган бўлсангиз, ушбу жамоалар ўртасидаги учрашувлар тарихи келтирилган хабарни ҳам ўқиган бўлишингиз аниқ. Ҳали бирор марта кўҳна шаҳардан ғалаба билан қайта олмаган темирйўлчилар ушбу мавсумда буни уддалай олишди.
Учрашувнинг дастлабки дақиқасиданоқ мезбонлар ҳужумга отланишди. 3-дақиқада Леонид Кошелев томонидан жарима майдонига етказиб берилган тўпга Рўзим Аҳмедов боши билан зарба берди. Вазиятга тўғри баҳо бера олган тажрибали Павел Бугало чамаси 2 метрлардан йўлланган тўпни қайтаришга муваффақ бўлди. 24-дақиқада меҳмонлар ҳам яхшигина ҳужум уюштиришди. Самарқандликлар дарвозабони билан яккама-якка чиқиб борган Жора Оганесян қулай вазиятни йўққа чиқарди. Айтиш лозимки, Андрей Мельничук ҳам ушбу вазиятда маҳорат кўрсатди.
Баҳснинг 29 дақиқасида тиниб-тинчимас Иван Нагаев Павел Бугало дарвозасига гол киритди, аммо ҳакам ўйиндан ташқари ҳолатни қайд этди. 40-дақиқада Иван Нагаев Бугалони яна бир бор имтиҳондан ўтказди. Дарвозабон билан бирга-бир вазиятга чиқиб борган Нагаев тўпни тўғри меҳмонлар посбонига йўналтирди. Биринчи бўлимнинг сўнгги дақиқалари бироз томонларнинг асабийлашиши билан эсда қолди.
Айнан 40-дақиқада Рўзим Аҳмедов ва Ислом Иномов жанжаллашиб кетишди. Оқибатда ҳакам икки футболчига ҳам сариқ карточка кўрсатди. Дастлабки тайм ана шундай воқейликлар билан ниҳоясига етди. Иккинчи бўлим меҳмонлар ташаббуси билан бошланди. Улар кетма-кет ҳужумлар билан самарқандликлар жарима майдончаси атрофида тез-тез пайдо бўлаверди. Бир неча вазиятдан фойдала олмаган тошкентлик темирйўлчилар 70-дақиқада охир-оқибат ниятларига етишди. Максим Казанков ҳимоячиларнинг бетартиб ҳаракатидан оқилона фойдаланди ва бўш қолган дарвозага тўпни йўналтирди – 0:1. Голдан кейин энди «Динамо» ҳужумга, «Локо» эса қарши ҳужумга таянган футбол намойиш эта бошлади. Таъкидлаш жоизки, самарқандликларнинг ҳужумлари шашқалоқлик оқибатида барбод бўлаверди.
«Динамо» (Самарқанд) - «Локомотив» (Тошкент) 0:1 (0:0)
Гол: Максим Казанков 70.
Ҳакамлар: Р.Бобомуродов (Навоий), Б.Норсафаров (Қарши), А.Усмонов (Тошкент), В.Нажафалиев (Тошкент).
«Динамо»: 77 Андрей Мельничук, 13 Александр Хвостунов, 2 Андрей Ерохин, 4 Жамол Отақулов, 17 Салим Мустафоев, 11 Дилявер Абибуллаев (Акмал Бозоров, 90), 15 Дилшод Жўраев (Турғун Қобилов, 87), 6 Леонид Кошелев, 18 Сирожиддин Сайфиев (Омаджон Тайлоқов, 76), 9 Иван Нагаев, 22 Рўзимбой Аҳмедов.
«Локомотив»: 1 Павел Пугало, 3 Ислом Иномов, 7 Садриддин Абдуллаев (Собир Усмонхўжаев, 80), 8 Максим Казанков, 9 Зайниддин Тожиев (Николай Гурьянов, 90+3), 10 Жора Оганесян, 13 Рустам Аъзамов,14 Ромик Хачатрян, 23 Бобурбек Юлдашев (Шерзод Шарипов, 85), 24 Дилшод Жабборов.
Огоҳлантиришлар: Ромик Хачатрян 22, Ислом Иномов 40, Рўзимбой Аҳмедов 40, Рустам Аъзамов 61, Жамол Отақулов 62, Зайниддин Тожиев 88, Салим Мустафоев 90+1,
Назоратчи: В.Валицкий (Тошкент).
