Меҳмонларнинг ғалабаси билан якун топган (0:1) "Динамо" - "Локомотив" учрашувидан кейинги ўтказилган матбуот анжуманида дастлаб меҳмонлар устози Ҳаким Фузайлов иштирок этди.
Ҳаким Фузайлов(“Локомотив” клуби бош мураббийи)
- Бугунги кунда Ўзбекистон чемпионати жуда яхши кўриниш олган. Чемпионатда 14 та бир-бирига муносиб жамоалар баҳслашмоқда. Ташкилотчилик ишлари ҳам юқори даражада. Шунинг учун клубнинг уй учрашуви бўладими, ёки сафардаги баҳсми мағлубиятдан ҳеч ким кафолатланмаган. Ўтган турда мағлубиятга учрагандик, мана бугун ғалаба қозондик. Бу ҳозиргина айтган сўзларимнинг исботидир.
- Жамоангизнинг охирги ўйинларида бир қатор футболчиларни майдонда кўрмаяпмиз. Мисол учун, Бахтиёр Ашурматовни. Улар жамоадан кетишганми?
- Ашурматов бугунги ўйинга тайёр эди. Аммо оилавий масалалар билан Самарқандга кела олмади. Музаффар Умрзоқовнинг эса жароҳати бор.
- Бундан ўн йилча муқаддам сиз Самарқандда ишлаган эдингиз. Ўша даврни биз мухлислар жуда яхши эслаймиз. Бугунги “Динамо”да ўша даврдагидек шижоатни ва фидойиликни кўрмаяпмиз. Шунингдек, “Локомотив” ҳам шундай аҳволда...
- Мен ишлаган даврда ташкилотчиларнинг қўллаб-қувватлаши аъло даражада эди. Шунингдек, Маҳмуд Раҳимов ажойиб жамоа шакллантирганди. Балки шу сабабли “Динамо”нинг ўша даврдаги ўйини яхши чиққан бўлиши мумкин. Бугун ҳам ўйлайманки, шароитлар ёмонмас. Жамоани тўлиқ шакллантириш учун мураббийга вақт керак бўлади.
- Аҳмад Убайдуллаев иккинчи мавсумни ўтказмоқда...
- Икки мавсум ҳам кам! Ўйлайманки, ҳали Убайдуллаев жамоаси сизга ажойиб ғалабалар тақдим этади. “Локомотив”нинг ўйинига келадиган бўлсак, ҳали клуб ўйинчиларининг имкониятларини ҳам тўлиқ ўрганиб чиқа олганим йўқ.
