Кутилмагани «Аталанта»нинг пешқадамлиги эмас, буни аввалам кўп кўрганмиз. Бу ерда ноодатий ҳолат — бергамоликларнинг ўйин услуби. Шу пайтгача Гасперини бизга қандай жамоа намойиш этган бўлса, шунинг бутунлай тескари «Аталанта»ни кўряпмиз ва у 1-ўринда бормоқда.

Аввалги «Аталанта» юқори прессинг қиладиган, тўпни назоратига эътибор қаратадиган ва бу услубни Италияда йўлбошчиси бўлган жамоа эди.

Ҳозир «Аталанта» тўп назорати бўйича 16чи, голли вазиятлар бўйича 8чи, аниқ зарбаларда 9чи, аниқ паслар бўйича 17чи, рақиб майдонида тўпни олиб қўйиш бўйича эса, 15чи ўринда.

Шу билан бирга, вертикал паслар, ҳужумни қайтариш, қуруқ ўйинлар бўйича етакчилардан бири. Энг кам гол ўтказган. Энг кўп пенальти тепган. «Аталанта»ми бу «Интер»?

Албатта, Гасперини бирданига ўзгариши, жамоаси бошқача ўйнай бошлаши имконсиз. Шунчаки, «Аталанта» мавсумнинг ҳамма ўйинида ҳисобни очган ва уёғига ҳисобга қараб ўйнамоқда. Аксарият ўйинларда ғалабани ушлаб қолди ҳам.

Бу даражада анормаллик натижаларнинг вақтинча эканини ҳам кўрсатади. Омад ҳам ўтган мавсумлардаги қарзини тўламоқда.

Балким «А Серия»да барқарор жамоанинг ўзи чиқмаётган ва 2-ўринни «Удинезе» эгаллаб турган мавсумда «Аталанта»га омад кулиб боқар?

Дарвоқе, яна бир ўта муҳим жиҳат. Бу йил ЖЧ ҳам бор. Яъни октябрдан бошлаб то мартгача еврокубокда ўйнайдиган жамоалар ҳафтасига икки ўйинли режимда тўп суради. «Аталанта» эса, рақобатчилар ичида Европада ўйнамаётган ягона клубдир. Бундан ташқари, жамоа сафида мундиалга бормайдиган футболчилар ҳам нисбатан кўпроқ. Яъни Гасперини бу сафар айнан жисмоний устунликка урғу бериб, мавсумдаги энг тетик жамоа сифатида қўшимча имконият яратиши мумкин. Кузатамиз.

Қаҳрамон Асланов.