«ПСЖ»нинг аргентиналик ҳужумчиси Мауро икарди охир-оқибат, Туркияга йўл олди.

У бир йиллик ижара битимига мувофиқ, «Галатасарой» клуби сафига қўшилди. Маълумотларга қараганда, аргентиналик футболчи бу муддатда 6,75 миллион евро миқдорида маош олади. Шундан 6 миллионини «ПСЖ», 750 мингини Истанбул клуби тўлайди.

Катта маош ўз йўлига. Табиийки, Икардининг трансфери унинг рафииқаси ва агенти Ванда Нара хоним аралашуви билан амалга ошди. Бунингсиз иложи бормиди ўзи? Маълум қилинишича, футболчи фаолиятида катта роль бажариб келган Ванда навбатдаги трансферда ҳам ўз ролини қойилмақом даражада уддалаган. Mundo Deportivo нашрида ёзилишича, у турмуш ўртоғининг Туркия Суперлигасида ўйнаши учун «Галатасарой» олдига 6та талаб қўйган ва улар клуб томонидан қабул қилинган.

Қизиқ, Ванда хоним қандай талабларни илгари сурган? Демак, унинг истаклари билан танишиб чиқамиз: 

1. Суткасига 24 соат оила хизматида бўлувчи шахсий ҳайдовчи.

2. Махсус таомнома асосида Мауро Икардига овқат тайёрлайдиган шахсий ошпаз.

3. Икардилар оиласи учун хавфсиз ва тўлиқ жиҳозланган шинам уй.

4. Шахсий қўриқлаш хизмати.

5. Мауро Икардининг декабргача яшаши учун элит меҳмонхонадан жой.

6. Ванда ва Мауро фарзандлари Истанбулда бемалол таҳсил олишлари учун талабга жавоб берадиган мактаб.

«Галатасарой» бу талабларни барчасини қабул қилди. Демак, энди гап Маурода қолди. У Туркияда бироз хиралашган фаолиятини қайта жонлантира оладими? Бунисини вақт кўрсатади, албатта.