"Барселона" сўнгги 20 йил ичида бир-биридан кучли номларни етиштирди. Улар дунё футболининг энг муҳим футболчиларига айланди. Аммо шундай футболчилар борки, аллақачон "Барселона" сафини тарк этган. Бироқ, улар ҳозирга қадар ўйнашда давом этмоқда. Қуйида шу ҳақида гаплашамиз.
Алекс Сонг
Алекс Сонг "Барса"да фақат 2 йилгина ҳаракат қилган. Кейинчалик, у "Вест Хэм"га ижарага бериб юборилади. Сонг ҳозирга қадар "Рубин Казан" ҳамда "Сьон" каби жамоаларда ўйнади. Айни дамда эса 35 ёшли футболчи Жибути чемпионатининг "Арта" клуби шарафини ҳимоя қилмоқда.
Рубен
Дарвозабон Рубен Ла-лига ўйинларида фақат 2 марта иштирок этган холос. Ўшанда у 19 ёш бўлган. 2004 йилда "Валенсия" ҳамда "Леванте" билан иккита ўйин ўтказган футболчи, қайтиб кўриниш бермади. Рубен 2008 йилда сотиб юборилади. У ҳозиргача "Депортиво" ҳамда "Райо Вальекано" сафида тўп тепган. Ҳозирда эса 38 ёшли қаҳрамонимиз "АЕК Ларнака"да ҳаракат қилмоқда.
Адреас Иньеста
Сиз уни ким эканини жуда яхши биласиз. Ҳа, Иньеста ҳозир ҳам футбол ўйнамоқда ва бу ақл-бовар қилмас воқеа. У 2018 йилда "Виссел Кобе"га йўл олганди. Мана, орадан 4 йил ўтган бўлсада, Иньеста ҳали ҳам майдонда.
Мартин Касерес
Умуман олганда, "Барселона" Касересни нега сотиб олганига ҳозир ҳам тушуниб бўлмайди. Балки, ўшанда раҳбариятга унинг соч турмаги ёққандир. Нима бўлганда ҳам Касерес Гвардиола жамоасида 23 марта майдонга тушган. Кейинчалик у "Леванте"га сотиб юборилади. Айни дамда эса Касерес "ЛА Гелакси"да ҳаракат қилмоқда.
Виктор Васкес
Васкес 2011 йилда "Барселона"дан кетади. Шундан кейин, "Брюгге"да анча вақт ўйнади. Ундан ташқари ярим ҳимоячи Мексика, Канада, Қатар каби давлатларда фаолият юритди. Ҳозирда у яна Бельгия чемпионатида.
Дани Алвеш
Иньеста каби Алвешни ҳам ҳали ҳамон майдонда экани ҳақида футбол мухлислари яхши билишади. У бутун дунёни лол қолдириб, 2021 йилда яна "Барселона"га қайтиб келганди. Алвеш 2001 йилда ўз профессионал фаолиятини бошлаган. Шундан бери ҳимоячи 47 та соврин ютишга эришган.
Нолито
Сиз Нолито ҳақида унутган бўлишингиз мумкиндир. Аммо у 2010-11 йилги мавсумда "Барселона" сафида 5 та баҳсда майдонга тушганди. Кейинчалик ярим ҳимоячи "Бенфика", "Гранада" ҳамда "Севилья" сафида тўп тепди. "Манчестер Сити"даги давр эса унинг энг ёрқин пайти эди. Ҳозирда Нолито Сегунда жамоаси саналмиш "Ибица" сафида ҳаракат қилади.
ИСМАТОВ Ж.
