"Реал" хўжайинлари 2021/2022 йилги мавсум охиридаги музокаралар бузилганидан кейин франциялик ҳужумчи Килиан Мбаппени таклиф қилиш ҳақида ўйламаяпти.

Ўшанда томонлар келишувга яқин қолганди, аммо узоқ давом этган музокаралардан сўнг футболчи "қаймоқранглилар" сафига ўтишдан бош тортди ва "ПСЖ" билан янги фойдали шартнома имзолади.

El Debate нашрининг ёзишича, “қироллик клуби" Мбаппенинг қилмишини хиёнат деб билади. Мадридда Килиан "ПСЖ" билан йирик шартнома имзолаш учун атайлаб "Реал" билан музокара олиб боришдан фойдаланган, деб ҳисоблашмоқда. Қолаверса, клуб бундан кейин жамоа мухлислари франциялик футболчини қабул қилмаслигига ишонч билдирмоқда.

Мбаппенинг "ПСЖ" билан янги шартномаси 2025 йилнинг ўрталарига қадар амал қилади.