"Манчестер Юнайтед"нинг сарф-харажатлари доим ҳам омадли бўлавермаган. Яъни, жамоа олиб келган футболчилари асосан ўзидан кутилган натижани бермайди. Йиллар давомида шундай бўлиб келди. 2021-22 йилги мавсумда эса бу кўрсаткич рекорд даражага етди. Қуйида "МЮ"нинг сўнгги даврлардаги сарф-харажатларига эътибор қаратамиз.
Манчестерликлар ўтган мавсум давомида жами 116 миллион фунт маблағни ортиқча сарф этган. Бу эса рекорд натижа ҳисобланади. Бунга 2021 йил ёзида Роналду ва Варан каби катта номларни жамоага олиб келингани ҳам катта таъсир кўрсатган. Ҳа, пандемия ўтгач, мухлислар яна стадионларга қайтди. Бу эса, ҳамма каби "МЮ"нинг ҳам даромадлари ошишига сабаб бўлди. Даромадлар кўрсаткичи 18 фоизга кўпайиб, йиллик 583 миллион фунтга етади. Аммо барибир клуб ҳафтасига ўртача 2,2 миллион фунтни ортиқча ҳаражатлар учун сарфлайверди.
Аввало, молиявий йўқотишлар ортида футболчиларнинг маоши кескин ошгани туради (19 фоизга). Бу эса "Манчестер Юнайтед" ўтган мавсум давомида 384 миллион фунтни фақатгина футболчиларга тўлаш учун ишлатганини англатади (АПЛ рекорди). Ушбу рақам бир йил олдингисига қараганда 62 миллионга кўпроқдир.
Юқоридаги каби ортиқча сарф-харажатлар клубни қарз гирдобига торта бошлаган. "МЮ"нинг умумий қарзлари 22 фоизга ошган ва ярим миллиарддан зиёд ҳажмга айланган (515 миллион фунт). Бундай натижа ундан олдинга мавсумдаги пандемия оқибатида юзага келгани айтилади. Ўшанда клубнинг йиллик умумий йўқотишлар ҳажми 92 миллион фунтни ташкил этган эди. Аммо бу билан ҳаммаси тугагани йўқ. Клуб яна йўқотишларга учраши мумкин. Айниқса, бу ёздаги 220 миллион фунтлик харидлардан кейин бунинг эҳтимоли ошиб кетди.
Клуб директори Жон Мурто юқоридаги манфий натижаларга ўз муносабатини билдирди. У яқин келажакда харажатлар ўз фойдасини беришини таъкидлаб, шундай дейди: "Умуман олганда, режалаштирганимиздан кўра кўп футболчи сотиб олдик. Шу сабабли келаётган трансфер ойналарида унчалик ҳам фаол бўлмаймиз. Доимо бизнинг режаларимиз, асосан, ёзги трансферлар ойнаси учун мўлжалланган бўлади. Олинган футболчилар жамоа учун зарур деб ҳисобланган эди".
ИСМАТОВ Ж.
