"ПСЖ" ҳужумчиси Лионель Месси ўзини ўтган йилгидан анча яхши ҳис қилаётганини айтди.

Эслатиб ўтамиз, парижликлар сафидаги дебют мавсумида аргентиналик футболчи Франция чемпионатининг 26 учрашувида 6 та гол урган ва 14 та голли узатмани амалга оширган. Футболчи янги мавсумнинг 8 та учрашувида 4 та гол ва 7 та голли узатмани амалга оширди.

"Ўзимни ажойиб ва ​​ўтган мавсумга нисбатан бутунлай бошқача ҳис қиляпман. Мен шундай бўлишини билардим. Бу ёз мен бутунлай бошқача бўлиб қайтдим. Клубда ўзимни қулайроқ ҳис қилдим. Энди мен яна қувноқ бўляпман", - деди Месси Адриен Гренье билан суҳбатда.

Эслатиб ўтамиз, бугун Месси Аргентина терма жамоаси сафида Гондурасга қарши ўртоқлик ўйинида дубл қайд этди ва унда Аргентина терма жамоаси 3:0 ҳисобида ғалаба қозонганди.