"Манчестер Юнайтед" Давид Де Хеа билан шартномани узайтириши мумкин.

Дарвозабон билан амалдаги келишув шу мавсум охиригача тузилган. Клуб шартномани 2024 йилгача узайтириш вариантини фаоллаштириш ёки йўқлигини кўриб чиқмоқда. Олдинроқ "Юнайтед" футболчиларнинг маоши учун рекорд даражада - йилига 384 миллион фунт стерлинг сарфлагани ҳақида хабар берганди.

Де Хеа 2019 йилда ҳафтасига 350 000 фунт стерлингга шартнома имзолаганди, аммо ўтган мавсумда "Манчестер Юнайтед" Премьер-лигада кучли тўртликни қўлдан бой берганидан сўнг бу пул камайди.

"Юнайтед" яқин ойларда дарвозабон билан шартномани яна бир йилга узайтириш ёки уни текинга қўйиб юбориш ҳақида қарор қабул қилади.

Агар испаниялик кетса, клуб унинг ўрнига ўйинчи билан шартнома имзолайди ва "Манчестер Юнайтед"га келиши мумкин бўлган деярли ҳар қандай дарвозабон Давиддан камроқ маош олади.

Ҳозирда, “Юнайтед” “Эвертон” дарвозабони Жордан Пикфордни кузатиб бормоқда. Унинг Мерсисайд клуби билан шартномаси 2024 йилгача мўлжалланган ва у топ-клубга ўтишдан манфаатдор.

Де Хеа "Манчестер Юнайтед"да 2011 йилдан буён тўп тепади. Жорий мавсумда у АПЛнинг 6 та ўйинида 8 та гол ўтказиб юборди.