Машҳур франциялик собиқ футболчи Эммануэль Пети ҳатто Франция терма жамоаси таркибида ҳам Париж клубидаги муаммолари ҳақида гапирадиган "ПСЖ" ҳужумчиси Килиан Мбаппени танқид қилди.
Петининг Le10sport.com сайтига айтишича, кейинги сафар "ПСЖ" матбуот анжуманида Мбаппега Франция терма жамоаси ҳақида савол бериш керак. Собиқ футболчининг қайд этишича, форвард муаммолари ҳақида матбуот билан эмас, балки мураббий Кристофф Галтье билан гаплашиши керак.
"Килиан аллақачон мени зериктира бошлади. У журналистларга нима истаётганини айтишни бас қилсин", - дея қўшимча қилди Пети.
Эслатиб ўтамиз, Килиан Мбаппенинг жамоадошлари билан муаммолари бор. Жорий мавсумда ҳужумчи Франция чемпионатида 7 та ўйин ўтказиб, 7 та гол урди.
