6 июль куни Тошкентнинг «Ардус» клуби ўзи ташкил топганидан буён энг муҳим учрашувни ўтказади. Шу куни «Ардус» футзал клублари ўртасидаги Осиё чемпионатининг финал ўйинида саф тортади. Бунга қадар Тошкент клуби мазкур нуфузли мусобақанинг финалига қадар етиб келмаганди.

Эроннинг «Санае Гити Пасанд» клуби ҳал қилувчи ўйинда «Ардус»га рақиблик қилади. Форс футзалчилари одатдаги каби финалга қадар катта устунлик билан етиб келиб, уларга қаршилик қилиш нақадар қийин эканини исботлай олишди. Аввалига гуруҳ босқичини жуда осон якунлаган эронликлар, ярим финалда амалдаги Осиё чемпиони – Япониянинг «Нагоя Оушенс» клубини 6:3 ҳисобида таслим қилишди.

«Ардус» ҳам бугунги рақиби сингари ўзи иштирок этган гуруҳни 1-ўринда якунлади. Финал остонасидаги ўйинда Қатарнинг «Ал-Райян» клуби 3:1 ҳисобида таслим қилинди.

Гарчи ўйин олдидан Эрон чемпиони яққол фаворит сифатида эътироф этилаётган бўлсада, тошкентликлар бош мураббийи Александр Петров рақибга нисбатан жиддий қаршилик кўрсатилишига ваъда бериб ўтди. Ҳар қандай вазиятда ҳам беллашувнинг қизиқарли ўтиши таҳмин қилиш қийин эмас. Боиси унда қитъанинг энг кучли икки футзал клуби ўзаро кураш олиб боради.

«Ардус» ва «Санае Гити Пасандом» клублари ўртасидаги финал беллашувини Тошкент вақти билан 22:40да «Спорт» телеканалида томоша қилиш мумкин.

Қайд этиш керак, финалга қадар етиб келган «Ардус» ўйиннинг эртасига – 7 июль куни соат 17:05да Тошкент халқаро аэрапортига етиб келади.