Кувайтда ўтказилаётган футзал бўйича Осиё чемпионатида бугун 2-тур баҳсларига старт берилди. "B" гуруҳида ўтказилган ўйинлардан сўнг гуруҳ ғолиби номи аниқ бўлди. Бу — Ўзбекистон.

Баҳодир Аҳмедов жамоаси Тожикистонга қарши ўйинда жуда қийин ғалабага эришди — 3:2. Натижада очколаримиз 6 тага етди. Тожикистонликлар ҳисобида эса 3 очко мавжуд.

Бугун бўлиб ўтган Туркманистон ва Баҳрайн жамоалари ўртасидаги учрашувда жанговар дуранг қайд этилди — 4:4. Натижада бу жамоалари мусобақадаги дастлабки 1 очкога эга бўлишди.

Регламент ҳақида
Демак, Ўзбекистон сўнгги турда Баҳрайнга ютқазса ҳам гуруҳ ғолиби сифатида қолади. Боиси, турнир регламентига кўра, очколар тенг келиб қолганида ўзаро ўйиндаги натижалар инобатга олинади. Тожикистон 3-турда Туркманистонни мағлуб этиб, 6 очкога эга бўлса ҳам, Ўзбекистонда ўтиб кета олмайди.

Баҳрайн ва Тукрманистон эса очколар бўйича ҳам бизга ета олмайди. Гуруҳда 2-йўлланмани қўлга киритиш учун Тожикистонга имконият юқори. Бу жамоа туркманлар билан дуранг ўйнаса ҳам чорак финалга чиқади. Туркманистон ва Баҳрайнга эса фақат ғалаба керак.

Чорак финалда ким билан ўйнаймиз?
Ўзбекистон "B" гуруҳи ғолиби сифатида плей-оффда "А" гуруҳида 2-ўринни эгаллаган жамоага қарши майдонга чиқади. Бу гуруҳда ҳозирча Кувайт ва Таиланд 3 очкога эга бўлиб туришибди (бугун бу жамоалар ўзаро тўқнаш келишади ва ғолиб чиққан жамоа катта эҳтимол билан гуруҳ ғолибига айланади). Ироқ ва Уммон ҳисобида эса очко мажуд эмас.

Ўзбекистон чорак финал баҳсини 4 октябрь куни ўтказади. Ўйин Тошкент вақти билан 22:00да бошланади. Унгача эса бизни 1 октябрь куни (16:00) Баҳрайнга қарши гуруҳнинг сўнгги ўйини кутиб турибди.

Манба: "Футбол қоидалари" телеграм-канали