Италиялик ҳужумчи Марио Балотелли яна можаролар исканжасига тушиб қолди. Трансфердан бир ой ўтгач, Швейцариянинг "Сьон" клуби италиялик ҳужумчини трансферга қўйди, деб хабар тарқатмоқда Calciomercato нашри.
Шу тариқа, клуб тизимли равишда режим бузилиши ва машғулотларга қатнашмаслик ҳолатларига муносабат билдирган. Швейцария клубидаги фаолияти давомида Балотелли лиганинг иккита учрашувида майдонга тушган.
Эслатиб ўтамиз, Балотелли "Сьон"га Туркиянинг "Адана Демирспор" клубидан ўтган эди. Норасмий маълумотларга кўра, ҳужумчининг трансфери швейцарияликларга 2,6 миллион еврога тушган.
Ажабланарлиси, Балотеллига ҳамон талаб бор. Италиянинг "В" Серияси иштирокчиси "Кальяри" 32 ёшли ҳужумчининг трансферига қизиқмоқда.
