Тошкент шаҳри мезбонлигида ўтадиган дзюдо бўйича 2022 йилги Жаҳон чемпионати 6 октябрь куни старт олди.
Дастлабки кунги баҳсларда ўзбекистонлик икки нафар спортчи ўз иштирокини ўтказди. Эркаклар баҳсида Дилшод Баратов (-60 кг) татамига чиққан бўлса, аёллар сафида Ҳалима Қурбонова (-48 кг) иштирок этди.
Қурбонова дастлабки босқичда туркиялик Мерве Азакни мағлуб этди, бироқ кейинги босқичда италиялик Ассунта Скуттога имкониятни бой бериб, ўз юришини тўхтатди.
Баратов Муҳаммад Аккаш (IJF), Артём Лесюк (Украина), Ли Ҳа Рим (Жанубий Корея) ва Ям Волшак (Исроил) каби спортчиларни енгиб, ярим финалга чиқди.
Финал остонасида Дилшод мўғулистонлик Ариунболд Энхтайванга енгилди. Бронза медали учун кечган баҳсда эса қозоғистонлик Елдос Сметовга имкониятни бой берди.
7 октябрь куни эркакларда -66 кг, аёлларда эса -52 кг вазн тоифаси вакиллари татамига чиқади. Ўзбекистон шарафини Сардор Нуриллаев, Диёра Келдиёрова ва Сита Қадамбоева ҳимоя қилади.
Мусобақа 14 октябрга қадар давом этади.
