Еврофутболда тенденсиялар ўзгариб туриши ҳеч кимга сир эмас. Шундайин, турли жамоаларда ишлаётган бош мураббийларнинг ҳам услублари турлича. Бугун эътиборингизга АПЛ тарихида ўртача кўрсаткичи энг яхши бўлган мураббийларнинг кучли ўнталигини ҳавола этмоқчимиз. Қуйида шу ҳақида баён этилади.
10. Микель Артета ("Арсенал") – 1,8 очко/ўйин
Микель Артета жамоаси намойиш этаётган маҳсулдорлик таҳсинга сазовар. "Арсенал" эса шунга яраша АПЛда етакчилик қилмоқда. Кўпчилик бу жамоани чемпионликка даъвогарлар қаторида иккинчи ўринга қўймоқда. Артета ўз жамоаси билан барча ўйинларда ўртача 1,8 очкодан жамғаришга эришган.
9. Карло Анчелотти ("Челси" ва "Эвертон") – 1,84 очко/ўйин
Италиялик мутахассис Европада, кучли бешлик чемпионатларида зафар қучган ягон шахс саналади. Анчелоттининг "Реал" билан амалга ошираётган ишларига қойил қолмасдан илож йўқ, албатта. Аммо у АПЛда анча камтарона бўлган. Айниқса, "Эвертон"да ишлаганида.
8. Томас Тухель ("Челси") – 1,94 очко/ўйин
Яхши натижа, аммо алалоқибат "Челси" учун ҳаммаси ҳам ижобий тугамади. Чунки Тухель кутилмаганда, сентябрь ойида ишдан олинган эди. Ҳа, ўша пайтда ҳамма "Челси"га ачинди. Аммо жамоа у кетгач, нисбатан яхшилана олди.
7. Арсен Венгер ("Арсенал") – 1,96 очко/ўйин
Венгер мавсумни мағлубиятсиз якунлаганида бир ўйинда ўртача 2,37 очко жамғаришга эришганди. Аммо "Арсенал"дан кетиш мавсумида бу кўрсаткич 1,66 очкогача тушиб кетди. Шу сабаб Венгер ҳозир ушбу рўйхатнинг олди қаторида эмас.
6. Жозе Моуриньо ("Челси", "МЮ", "Тоттенхэм") – 2,03 очко/ўйин
Натижага қарамай фикр билдириш мумкин: Жозенинг "Челси"даги сўнгги мавсуми жуда ҳам ёмон тугаган, "МЮ" ҳақида ҳам шундай дейиш мумкин. "Тоттенхэм"нику, айтмаса ҳам бўлади. Аммо таъкидлаш керакки, у "Челси" ажойиб жамоа қура олганди.
5. Роберто Манчини "(Манчестер Сити") – 2,05 очко/ўйин
У "шаҳарликлар" учун илк АПЛ титулини ютиб берган. Яна нима хоҳлаш мумкин? Бироқ, ўша пайтда "Манчестер Сити" раҳбарлари ундан ниҳоятда кўп нарсани истаган. Шу сабаб Манчини ўз триумфидан бир йил ўтгач, истеъфога чиққан. Аммо унинг иши тарихда абадий қоладиган бўлди.
4. Антонио Конте ("Челси" ва "Тоттенхэм") – 2,12 очко/ўйин
Контенинг футбол услубияти унчалик ҳам зўр эмасдир. Лекин адолат юзасидан айтиш керакки, у баҳсларни ютишни яхши билади. Конте "Челси"даги илк мавсумидаёқ АПЛ чемпионлигини қўлга киритган. Аммо кейинги мавсум ҳаммасини тугашига сабабчи бўлади. Айни дамда эса италияликнинг "Тоттенхэм" билан ишлари унчалик ҳам ёмон эмас.
3. Юрген Клопп ("Ливерпуль") – 2,13 очко/ўйин
Клопп АПЛни қўлга киритган мавсумида унинг жамоаси ўртача 2,61 очкога эга чиққан. Ўтган мавсум эса бу кўрсаткич 2,42ни ташкил этди. Янги мавсумдан эса ҳамманинг яхши хабари бор. Юрген Клоппнинг умумий қилган ишларига барибир тан берсак арзийди.
2. Сер Алекс Фергюсон ("Манчестер Юнайтед") – 2,16 очко/ўйин
Фергюсон "МЮ"да 21 мавсум ўтказган бўлса, шундан фақат иккитасини ўртача 2 очкодан паст ҳолда якунлаган. Мана шу статистиканинг ўзи ҳам буюк мураббийнинг ақл-бовар қилмас барқарорлигини исботлайди. Фергюсон абадий футбол тарихининг энг ёрқин саҳифаларидан жой олади.
1. Гвардиола ("Манчестер Сити") – 2,36 очко/ўйин
Гвардиола 2016 йилдан бери "шаҳарликлар"ни мутлақо бошқа жамоага айлантирди. Клуб даражаси ошди ва кўплаб совринлар учун даъво қила бошлади. Бунда Пепнинг ҳиссаси беқиёс эканини ҳамма яхши билади. Ҳатто, бу мавсумда ҳам АПЛ ва ЕЧЛ учун энг фаворит клуб "Манчестер Сити" бўлиб турибди.
ИСМАТОВ Ж.
