Куни кеча Стефано Пиоли "Милан"ни бошқаришни бошлаганига уч йил бўлди. Пиоли "Милан"ни 2019 йилнинг 9 октябрь кунида қабул қилиб олганди. Унинг саъй-ҳаракатлари оқибатида ўтган мавсумда жамоа лига чемпионлигини қўлга киритди.
Журналистлар Пиолидан клубни қабул қилиб олганида муваффақиятга эриша олишга ишонгансизми, деб савол беришди. Чунки бунгача у ҳам чемпионликни қўлга кирита олмаганди. Пиоли қобилиятли мураббий ҳисобланса-да, ҳеч қачон супермутахассислар рўйхатига киритилмаган.
"Мен ҳар доим муваффақиятга ишонишга ҳаракат қиламан ва клуб менга муваффақиятни топиш ва ривожлантиришга имконият яратиб берди. Қачонки меҳнат қилишдан тўхтамасангиз, ўрганишда давом этсангиз ва ривожланиш истагини оширсангиз, албатта ҳамма ўйлаган нарсаларингизга эришишингиз мумкин", - деди Пиоли pianetamilan.it сайтига.
