Европанинг топ-бешлик чемпионатларида йиллар давомида ўнлаб супер-юлдузлар етишиб чиқди. Бу номларни бугун ҳамма танийди. Қуйида ушбу лигаларда 50 та голлик довонга энг тез етган футболчиларнинг 10 тасини эътиборингизга тақдим этамиз. Роналду ва Месси етакчи десангиз адашасиз. Бизда уларни ҳам ортда қолдира олган ном бор. Унинг исми – Эрлинг Холанд. Ҳаммаси адолатли бўлиши учун ҳисобни у туғилган, 2000 йилдан кейин олишни маъқул кўрдик. Демак, бошладик.
10. Муҳаммад Салоҳ ("Челси", "Ливерпуль")
Салоҳ бу рўйхатнинг юқорироғида бўлиши мумкин эди. Аммо унинг "Челси"даги омадсиз даври бунга йўл қўймади. Мисрлик ҳужумчи АПЛда 72 та баҳсда 50 та гол уришга эришган. Бу борада фақат Алан Ширер ундан яхшироқ натижага эга.
9. Фернандо Торрес ("Ливерпуль")
"El niñо"нинг Англияга келиши бутун жаҳонга катта довруғ солади. Испаниялик ҳужумчи "Энфилд"даги илк мавсумида 24 та гол уришга эришган. Аммо жароҳатларлар унинг муваффақиятларига ҳалақит қилди. Торрес учун дастлабки 50 та голга 72 та ўйин керак бўлди.
8. Руд ван Нистелрой ("МЮ")
Ҳа, Ширер ва Энди Коул Нистелройга қараганда яхшироқ натижаларга эга эди. Аммо сўнгги 25 йилда эмас. Нистелрой 68 та баҳсда 50 та гол уришга эришган ҳужумчи эди. У "МЮ"да жами 150 та баҳсда 95 та гол уришга эришган.
7. Андрей Шевченко ("Милан")
Машҳур украиналик футболчи йигирма биринчи аср аввалининг йирик намоёндаси саналади. У "Динамо Киев"дан "Милан"га келади ва 68 та баҳсда 50 та голга муаллифлик қилади. У бу орқали А серия рекордини ўрнатишга эришган эди.
6. Криштиану Роналду ("Ювентус")
Роналду Туринга келганида, аллақачон дунёнинг энг кучли тўпурарига айланган эди. Шу сабаб у ўз ишини Италияда ҳам давом эттириши ҳеч кимни ажаблантирмади. У "Ювентус"даги дастлабки 61 та баҳсида 50 та гол уриб, Шевченконинг рекордини янгилайди.
5. Златан Ибрагимович ("ПСЖ")
Ибрагимович "Qatar Sport Investment"нинг "ПСЖ"да амалга оширган илк йирик хариди эди. Швеция терма жамоаси аъзоси бўлган ҳужумчи, ўшанда энг яхши сермаҳсуллик кўрсатган. У 122 та лига баҳсида жами 113 та гол уришга эришади. 50 талик довонга етиш учун эса Златанга атиги 59 та ўйин кифоя қилган.
4. Луис Суарес ("Барселона")
АПЛ тарихида камдан кам футболчи Суареснинг 2013-14 йилги мавсумда қилган ишини амалга ошира олади. Унинг фантастик ўйинлари "Барселона"ни ўзига қаратган эди. Суарес 2014 йилги Жаҳон чемпионатида Кьеллинини тишлагани сабабли 4 ойга футболдан четлатилган. Аммо бу вақт "Барселона"ни кутиши учун арзир эди. Суарес 2014-15 йилда Энрике қурган жамоанинг юрагига айланди. У учун 59 та баҳс, 50 та гол уришга учун етарли бўлганди.
3. Неймар ("ПСЖ")
Неймарнинг Парижга келиши катта воқелик эди. Аммо футболчининг ўйин даражаси учун бу нарса тескари таъсир кўрсатган. У 4 йил давомида анча қийналди. Аммо Лига 1 да 58 та баҳсда 50 та гол уришга эришди. Бу эса энг яхши учинчи натижа эди.
2. Криштиану Роналду ("Реал")
Роналдунинг 2009 йилда "Реал"га кўчиши ўта довруқли кечганди. Шунга яраша, португалиялик футболчи ўзини кўрсата олади. Ла-лигадаги дастлабки мавсум у учун 26 та гол билан якунланади. Аммо кейинги мавсумларда Роналду фақат ва фақат яхшиланиб борди. Унинг 50 та голга етиши учун эса 51 та баҳс керак бўлди.
1. Эрлинг Холанд ("BVB")
Холанд "Боруссия Дортмунд"га 19 ёшида келади. Гарчанд ўспирин бўлишига қарамай, у аллақачон етук ҳужумчига айланиб улгурганди. Бу унинг "арилар" таркибидаги дебют ўйинида хет-трикка эришганида ҳам ўз аксини топган. Норвегиялик ҳужумчи 2021 йилнинг ноябрида, ўзининг эллигинчи Бундеслига баҳсида эллигинчи голига муаллиф қилган. Бу эса Европада сўнгги 22 йилдаги мутлақ рекорддир.
ИСМАТОВ Ж.
