Футболда рақиб дарвозаси томон хавф яратилишида энг кўп иштирок этувчилар одатда ўнинчи рақам эгаси бўлишади. Англияда АПЛга асос солинганидан буён (1992-йил) "Арсенал" клубида ана шундай кучга эга бўлган кўплаб футболчилар ҳаракат қилишган. Қуйида ушбу жамоанинг энг машҳур ва энг яхши, либосига ўнинчи рақамни таққан 7 та футболчиси ҳақида сўз боради.
7. Вильям Галлас
"Челси"дан Лондоннинг бошқа бир клубига йўл олгач, Галлас "Арсенал"да Денис Бергкампнинг рақамини олади. Ҳа, марказий ҳимоячи 10 рақамда ўйнаши, ўта ғалати туюлади. Аммо у тарихда Венгер жамоасининг муҳим бўғини бўла олган. Галлас "Арсенал"даги 4 йилни шунчаки фантастик ўтказди.
6. Эмиль Смит-Роу
Ҳамма "Арсенал"нинг ҳозирги ўнинчи рақамини яхши танийди. Смит-Роу "Арсенал" академиясидан чиққан яна бир ёрқин юлдузлардан бири саналади. Айтиш мумкинки, унинг потенцияли жуда юқори. Аммо айни дамда жароҳат сабаб, асосий жамоадан анча узоқлашиб қолган. Микель Артета эса уни қайтаришни жуда хоҳлайди.
5. Жек Уилшер
Уилшер дунёдаги "очилмай қолган талантлар"нинг энг ёрқин намоёндаси саналади. У ўзининг энг зўр даврида "канонирлар" марказий майдонини жуда яхши назорат қилган. Арсен Венгер ундан кўп нарса кутганди. Аммо жароҳатнинг жиддийлиги, ҳаммасини ўзгартириб юборди. Ўз фаолиятини эрта тугатишга мажбур бўлган футболчи, айни дамда "Арсенал" академиясида мураббийлик қилмоқда.
4. Месут Ўзил
"Арсенал" тарихида Ўзилдек икки хил таассуротга қолдирган футболчи бўлмаган бўлса керак. Немис ярим ҳимоячиси майдонда дирижорлик қилган. Аммо айни пайтда, ўзининг айрим қилиқлари сабабли мухлислар ғазабига дучор бўлган. Нима бўлган тақдирда ҳам ўнинчи рақамда ўйнаган Ўзилдек футболчи бошқа топилмайди. На "Арсенал", ва на "Реал" таркибида.
3. Пол Мерсон
Мерсон ўз вақтида Англиянинг энг яхши ҳужумкор футболчиларидан бири бўлган. У ҳужумчилар ортида бенуқсон ҳаракатлана оларди. Футболчи 12 йил давомида "Арсенал"га катта ёрдам бериб, кейинчалик "Мидлсбро"га кетган. Мерсоннинг АПЛ ва инглиз футболида тутган ўрини ҳам юқори бўлган.
2. Робин ван Перси
АПЛ тарихидаги энг шавфқатсиз ҳужумчилардан бири бўлган ван Перси, Бергкампнинг рақамида ўз фаолиятини бошлайди. У "Арсенал"нинг тарихида энг яхши ҳужумчилар рўйхатидан жой олган. Ҳа, якунда унинг "МЮ"га ўтиши жуда ҳам ғалати туюлади. Аммо "Арсенал" учун ван Перси ҳикояси ўзгачадир.
1. Деннис Бергкамп
Майдондаги исталган футболчидан осон ва оддий ўтиб кета оладиган ҳужумчи. Нидерландияликка шундай таъриф тўғри бўлади. Бергкамп "Арсенал"нинг афсонавий сиймосидир. Айнан унинг даврида клубнинг ҳайрихоҳлари кескин кўпайган. Бу эса ҳужумчининг нималарга қодир бӯлганидан далолат беради.
ИСМАТОВ Ж.
