Бугун Испания чемпионатининг 8-туридан ўрин олган "Реал" ва "Барселона" жамоалари ўртасидаги ўйин Тошкент вақти билан 19:15да бошланади. Ўйинни "Спорт" канали орқали шарҳлайдиган спорт журналисти бу ҳақда қуйидагича хабар қолдирди:

"У профессионал футболга 2017 йилда кириб келди. Ўртоқлик ўйини эди. Бугун эса орадан 5 йил ўтиб у клублар ўртасидаги энг муҳим учрашувда дебют қилишга тайёргарлик кўрмоқда. Бу дебютгача бўлган йўлни бироз эслаш керак.

Осмон мезонлардан йилтирар эди. 5 йил аввал эди, ёз эди, еру осмон тиниқ эди. Ва ҳавода ўргимчак иплари оҳиста сузардики...

Илк ўйин, илк уриниш, илк таассурот ва илк хатолар! У ўзига бўлган ишончни топиш учун майдонда тўп ортидан тинмай югурар, асли ўзига бўлган ишончни эмас, ўзини изларди гўё...

Бугунгача у Россиядаги мундиалда ўйнади, Евро-2020 учрашувларида ҳам ҳаракат қилди.

2022 йил аввалида эса жамоасини ўзгартирди. Асли бу йил унинг учун фарқли ўтмоқда. Баҳорнинг сўнгги кунлари у Чемпионлар лигаси финалида дебют қилди. Ёдингизда бўлса ўшанда “Реал” “Ливерпуль”ни енгиб титулни қўлга киритганди. 

2022 йил, 16-октябрь

Айтилгандек, бу кун у илк бор "эл-класико"да ҳаракат қилиши лозим. Тайёргарлик ҳар доимгидан ўзгача, боиси ҳаяжон ҳам доимгидан фарқли. Катта ўйин. Муҳим ўйин!
 
Яхши ҳам-ки, у ўша 5 йил аввал – илк профессионал ўйинда ёнида бўлган жамоадоши билан бугун ҳам бирга ҳаракат қилади. Шунда осонроқ бўлади. Шунда яхшироқ бўлиши керак...

Ҳа, дўстлар, бу мен учун илк класико бўлади!"

Ориф Толипов.