“Лион” ярим ҳимоячиси Корентин Толиссо Франсия чемпионатининг 11-туридан ўрин олган “Ренн”га қарши ўйинда (2:3) жароҳат олди. Бу ҳақда футболчи твиттердаги саҳифасида малум қилди.

“Афсуски, яна жароҳат олдим. Лекин мен таслим бўлмайман. Бу спортнинг қонуни! Мен имкон қадар тезроқ қайтиш ва яна 100 фоиз тайёр бўлиш учун кўп меҳнат қилишда давом этаман!” Толиссо ёзган.

28 ёшли франциялик футболчи сонини жароҳатлаб, кўзларида ёш билан майдонни тарк этди. Футболчининг чап сонида жароҳат борлиги аниқланган, шу сабабли у бир неча ой, жумладан ЖЧ-2022ни ўтказиб юборади. Франция терма жамоаси жаҳон чемпионатининг амалдаги ғолиби ҳисобланади.

Ўтган ёзда Толиссо "Бавария"даги беш йиллик фаолиятидан сўнг эркин агентга айланди ва ўзи тарбияланувчиси бўлган "Лион" билан шартнома имзолаб, Францияга қайтди.