"Барселона" ярим ҳимоячиси Гави "Golden Boy-2022" совринини қўлга киритди.
7 ноябрь куни испаниялик футболчига Туринда мукофот топширилади.
Аввалроқ, 18 ёшли ярим ҳимоячи йилнинг энг яхши ёш футболчиси учун бериладиган Раймонд Копа мукофотини ҳам олганди.
Tuttosport нашрининг Европанинг энг яхши ёш футболчиси соврини учун даъвогарлар рўйхатига 20 нафар футболчи киритилган.
Гавидан ташқари яна 19 нафар футболчи совринга даъвогарлик қилди. Улар орасида Жамол Мусиала («Бавария»), Жуд Беллингем («Боруссия»), Эдуардо Камавинга («Реал») ва бошқа футболчилар бор эди. 2021 йилда бу совринни “Барселона” ярим ҳимоячиси Педри олди.
Гави ўтган мавсумда "Барселона"да асосий таркибдаги дебютини ўтказди.
