Наманганнинг "Навбаҳор" клуби иккинчи давра ўйинларига тайёргарликни Тошкентда давом эттирмоқда.
Тошкентда бир қатор назорат учрашувларини ўтказишни режалаштирган "Навбаҳор" уларнинг дастлабкисини 16 июль, душанба куни "Бухоро" жамоасига қарши ўтказади.
Айни вақтда жамоа таркибида бир қатор ёш футболчилар кўрикдан ўтишмоқда. Улар орасида "Машъал"дан таклиф қилинган ҳужумчи Соҳиб Абдуллаев, мавсумнинг биринчи ярмини "Косонсой" таркибида ўтказган Даврон Исоқов, шунингдек, "Навбаҳор"нинг ўз тарбияланувчиси Мурод Раҳмонов кабилар бор.
"Шу кунларда таркибга тажрибали ўйинчиларни келиб қўшилиши кутилмоқда", - деб ёзади "Навбаҳор" расмий сайти.
Эслатиб ўтамиз, "Навбаҳор" биринчи давра ўйинларидан сўнг Олий Лига мусобақа жадвалида, 13 ўйиндан сўнг 14 очко билан, 11-ўринни эгаллаб турибди. Жамоа иккинчи давра ўйинларини 3 август куни ўз майдонида "Машъал"га қарши ўйин билан бошлайди.
