Суперлиганинг 23-туридан ўрин олган “Қўқон-1912” – “Сўғдиёна” (2:1) ўйинидан сўнг мезбонлар устози Даврон Файзиев узоқ кутилган ғалаба, жароҳатини даволаётаётган футболчилар ва учрашувда унинг фикрича ким энг яхши ўйинчи бўлгани ҳақида гапирди.

“Аввало, узоқ кутилган ғалабани содиқ ва бизга охиригача ишонган фидойи мухлисларимизга бағишлаймиз. Ўйин олдидан бир қатор йўқотишлар бўлганига қарамай, қийин учрашувда ғалабага эришдик”, - деди Файзиев.

“Биз ҳам, “Сўғдиёна ҳам” сўнгги пайтлардаги бир қатор муваффақиятсиз ўйинлардан сўнг ўхшаш аҳволда эдик. Шунга қарамай, бугун рақибимиз бугун бизга қарши ажойиб ўйнади. Биз билан тенгма-тенг вазиятлар яратди. Норхоновнинг зарбаси гол бўлганида, биз мағлуб эдик”.

“Иван Ёсович учун мавсум тугади дейиш мумкин. Жароҳати туфайли мавсумда бизга бошқа ёрдам бера олмаса керак. Жавоҳирга келсак, унинг аввалги турда “Пахтакор”га қарши ўйинда жароҳатини янгилашига мен айбдорман. Жароҳати бўлса ҳам, уни майдонга туширганим учун жароҳатини қайталаб олди. Таваккал қилмаслигим ва биринчи таймдан кейин уни алмаштиришим керак эди”.

“Фикримча, бугун энг яхши футболчимиз дарвозабон бўлди. Бошқалар ҳам зўр ўйнашди, масалан, Мурод Холмуҳаммедов ва Ойбек Рустамов. Умуман, бугун ҳамма зўр ўйнади. Билолхон эса – қаҳрамон. Ғалаба голини киритгандан кейин бошқалардан ҳам яхшироқда”.