"Барселона" ўнг қанот ҳимоячисига қизиқиш билдирмоқда.
Каталонияликлар бош мураббийи Хави бу трансферни клуб учун устувор вазифа деб ҳисобламоқда. Бу ўринга янги футболчи қишда қўшилиши мумкин.
Ёзда "Барселона" Эктор Бельеринни ўз сафига қўшиб олди - у трансфер ойнаси охирида клубга эркин агент сифатида қўшилди. Футболчи жамоадаги энг кам маошга - йилига 400 минг еврога рози бўлди.
Бироқ мавсум давомида клуб Бельериннинг ўйинидаги камчиликларни кўрди - айниқса, йирик учрашувларда. Клуб аллақачон у билан шартномани узайтирмасликка қарор қилган.
Баъзи ўйинларда Хави марказий ҳимоячилар Жюль Кунде ва Рональд Араухони ўнг қанотда ишлатди. Серхи Роберто ҳам ҳимоянинг ўнг қанотида ўйнай олади, аммо у ярим ҳимояда ўзининг асл позициясида ўйнашни афзал кўради.
Олдинроқ "Барса" "Манчестер Юнайтед" ҳимоячиси Диогу Далотга қизиқаётгани ҳақида хабарлар тарқалган эди. Унинг клуб билан шартномаси мавсум охирида тугайди, бироқ “МЮ” шартномани бир мавсумга узайтириш вариантидан фойдаланиши мумкин.