"Barselona" o‘ng qanot himoyachisiga qiziqish bildirmoqda.

Kataloniyaliklar bosh murabbiyi Xavi bu transferni klub uchun ustuvor vazifa deb hisoblamoqda. Bu o‘ringa yangi futbolchi qishda qo‘shilishi mumkin.

Yozda "Barselona" Ektor Belyerinni o‘z safiga qo‘shib oldi - u transfer oynasi oxirida klubga erkin agent sifatida qo‘shildi. Futbolchi jamoadagi eng kam maoshga - yiliga 400 ming yevroga rozi bo‘ldi.

Biroq mavsum davomida klub Belyerinning o‘yinidagi kamchiliklarni ko‘rdi - ayniqsa, yirik uchrashuvlarda. Klub allaqachon u bilan shartnomani uzaytirmaslikka qaror qilgan.

Ba’zi o‘yinlarda Xavi markaziy himoyachilar Jyul Kunde va Ronald Arauxoni o‘ng qanotda ishlatdi. Serxi Roberto ham himoyaning o‘ng qanotida o‘ynay oladi, ammo u yarim himoyada o‘zining asl pozisiyasida o‘ynashni afzal ko‘radi.

Oldinroq "Barsa" "Manchester Yunayted" himoyachisi Diogu Dalotga qiziqayotgani haqida xabarlar tarqalgan edi. Uning klub bilan shartnomasi mavsum oxirida tugaydi, biroq “MYU” shartnomani bir mavsumga uzaytirish variantidan foydalanishi mumkin.