Про Лига 25-туридан ўрин олган «Янгиер» — «Шўртан» учрашувидан сўнг мезбонлар бош мураббийи Диёр Мирзақулов матбуот анжуманида иштирок этиб, журналистлар саволларига жавоб берди.

— Ўйин ҳақида гапирадиган бўлсам, мавсум охирида кўплаб футболчиларда мотивация йўқолган ва яна баъзи сабаблар бор. Лекин бугунги ўйин учун барча йигитларга раҳмат айтган бўлар эдим. Якка курашларда ютқазмадик. Футболчиларда шижоат кўриниб турди. Айниқса U-19 ёшидаги тўртта боламиз яхши ҳаракат қилишди. «Шўртан»дек номдор клубга қарши ўзларини йўқотиб қўйишмади. Ўйин натижасидан, йигитларнинг бугунги учрашувга бўлган муносабатидан хурсанд бўлдим. Ғалаба қозонишимиз ҳам мумкин эди. Рақибнинг голидан кейин ҳам бизда имкониятлар бўлди. Дуранг натижа адолатли бўлди деб ўйлайман.

— Сўнгги сонияларда ҳисобни тенглаштирган Муҳриддин Расулов ва U-19 жамоаси футболчиларинг ҳаракатларидан қониқдингизми?
— Албатта, ўзингиз кузатяпсизми? Бизнинг таркибда қолган жамоаларга нисбатан энг ёш футболчилар 2001, 2002, 2003 ,2004 йилларда туғилган ёш йигитлар ҳаракат қилишмоқда. Мен уларнинг ўйинларидан қониқдим. Улар майдонда борларини бериб ўйнашди. Бу нимадан далолат беради? Бу йигитларнинг келажаги бор. Уларга кейинги йилдан янада кўпроқ имконият бериш керак. Вазиятимиз ҳам яхши эмас, аммо шунга қарамасдан йигитлар борини бериб ўйнашди. Бугунги футбол ҳаммага ёқди.  Стадионга ташриф буюрган мухлислар ҳам хурсанд бўлишди. Футболчиларимиз ҳеч қайси вазиятда «Шўртан»га имконият беришмади.

— Бу учрашув «Янгиер»нинг «Шўртан» билан ўзаро тўртинчи беллашуви. Меҳмонда иккита ўйинда 4:0 ҳисобида мағлуб бўлган. Уйдаги иккита учрашувда ҳам 1:1 ҳисоби қайд этилган. Бу йил «Шўртан» мағлуб этилмади. Шу ҳақида...

— Билмадим. Тарихда «Шўртан» жамоасини мағлуб этмаган эканмиз. Биринчи даврада келганимда 0:4 ҳисобида ютқазган эканмиз. Яна ҳаракат қилдик, 1:1 натижаси қайд этилди. Бориб яна 0:4 ҳисобида ютқизгандик. Бугун бор ирим-сиримларни йўқотиб, «Шўртан»ни мағлуб этишга келишгандик. Лекин бугун ҳам ғузорликларни мағлуб этишни имкони бўлмади.

"Шўртан" ПФК матбуот хизмати