Қозоғистон пойтахти Астана шаҳрида UEFA Ассист лойиҳаси доирасида футбол мутахассислари малакасини оширишга йўналтирилган UEFA STEP Senior Team Executive Programme дастури бўйича ўқув-семинари ташкил этилди.
UEFA STEP дастури футбол ассоциациялари ҳамда профессионал футбол лигаларида фаолият олиб бораётган етакчилик хислатларига эга мутахассислар учун мўлжалланган бўлиб, дастурнинг мақсади уларга иш фаолиятининг барча йўналишларида Европа футболининг энг олди тажрибасини ўртоқлашиш ва замонавий футбол кўникмаларини сингдиришдан иборат.
7-11 ноябрь кунлари Астана шаҳри мезбонлик қилган семинарда Ўзбекистон футбол ассоциацияси бош бухгалтери Сурайё Пўлатхўжаева, Мусобақалар ўтказиш бўлими бошлиғи Муҳаммад-Содиқ Содиқ Охунов ва Ўзбекистон Профессионал футбол лигаси Клубларни лицензиялаш ва халқаро алоқалар бўлими бошлиғи Зохиржон Акрамхонов иштирок этди.
Семинар давомида футбол тузилмалари фаолиятини йўлга қўйиш, стратегик бошқарув, спорт ташкилотлари молиясини юритиш, мусобақаларни ўтказиш, футбол учрашуви қайдномаларини электронлаштириш, медиа, маркетинг ва ҳомийлар билан ишлаш каби мавзуларда UEFA академияси мутахассислари интерфаол услубда маърузалар олиб боришди.