18 ёш бўлишига қарамай, "МЮ"нинг ёш, талантли футболчиси Алехандро Гарначо ўзини яхши томондан намойиш этди. 2020 йилда "Атлетико"дан харид қилинган ярим ҳимоячи, "қизил иблислар"нинг ёш юлдузига айланиб улгурди. У 2021-22 йилги мавсум якунларига кўра, йилнинг энг яхши ёш футболчиси деб топилган. Аргентиналик кеча, "Фулхэм"га қарши баҳсда сўнгги дақиқаларда ғалаба голига муаллифлик қилган эди. Қуйида Гарначо ҳақида машҳур юлдузлар томонидан айтилган фикрлар билан танишамиз.

Бруну Фернандеш

"У яхши даражада. Аммо биз ундан янада кўпроғини кутамиз. Мен Гарначонинг машғулотлардаги ҳаракатлатига қойил қоламан. Меҳнатлари сабаб Гарначо ўз имкониятларига эга бўлмоқда ва бунга ҳақли".

Пол Скоулз

"Мен шундай ёш футболчиларни кўрсам, доимо қувонаман. Менимча, унда гол сезиш қобилияти яхши шаклланган. Алекс рақиб учун ҳақиқий хавф туғдира оладиган футболчига айланиб бормоқда. Мухлислар уни яхши кўради. Мен Гарначони Роналдунинг ёшлигига қиёслаган бўлардим".

Хавьер Маскерано

"Алехандрода ўсиш учун ҳамма нарса бор. У катта потенциялга эга. Яхши тарбияланса, у Аргенинанинг ҳам келажакдаги юзи бўлишга қодир бўлади".

Ральф Рангник

"Мен унинг талантидан хабардор бўлганим учун ҳам, уни асосий жамоа билан машғулотларга таклиф этдим. У ўзи тенги футболчилардан кўра яхшироқ ҳаракат қилади. Унинг ўйинида футболчига керакли ҳамма нарса бор. Агарда Алехандро ҳар куни яхшиланишга ҳаракат қилиб борса, тез орада катта марраларни забт эта олади".

Лисандро Мартинес

"У ўрганишни давом эттириши керак. Унинг ёшида катта футболчилар гуруҳи ичида бўлиш осон бўлмайди. Мен унга ҳар бир имкониятдан унумли фойдаланиш, эшитиш, маслаҳат сўраш ва албатта, машғулотларда фаол бўлиши кераклигини айтдим. Ўйлайманки, "МЮ"даги қадамлари уни ёрқин келажак сари бошлайди. Ҳаммаси унинг ўзига боғлиқ. Футболда ҳаракатдан тўхтамаслик, муваффақият гарови бўла олади".

ИСМАТОВ Ж.