Хабарингиз бор, Суперлигасининг 2022 йилги мавсуми якунига етди. Якунланган мавсумда мамлакатимиз жамоаларига Осиё Чемпионлар Лигаси (ОЧЛ)дан 2+2 квотаси ажратилганди, яъни, Ўзбекистон чемпиони ва кубок соҳиби ОЧЛ гуруҳ босқичига тўғридан – тўғри йўлланма олса, яна 2 та клуб гуруҳ босқичи йўлланмасини қўлга киритиши учун “плей-офф” баҳсларида иштирок этади.
“Пахтакор” Суперлига чемпиони, “Насаф” эса Ўзбекистон кубоги соҳиби сифатида ОЧЛ 2023/2024 йиллар мавсумининг гуруҳ босқичида иштирок этадиган бўлди.
Ўз тарихида илк марта 2-ўринни қўлга киритиб, кумуш медалга сазовор бўлган "Навбаҳор" эса ОЧЛдаги дебют ўйинини саралаш босқичида Уммоннинг “Ал-Сиб” клубига қарши ўтказади. “Лочинлар” “Ал-Сиб”ни мағлубиятга учратишса, Қатарнинг тўртинчи жамоасига қарши ўйнашади.
Якунланган мавсумда 4-поғонани банд этган АГМК ҳам ўз иштирокини саралаш босқичидан бошлайди. Олмалиқликларга илк беллашувда Бангладешнинг “Башундара Кингз” жамоаси рақиб бўлади. Мазкур жуфтлик ғолиби эса Қатарга боради ва мазкур мамлкатнинг 3-ўринни олган клуби билан ўйнайди.
ОЧЛ “плей-офф” баҳслари келаси йилнинг август ойида старт олади.
Бўлажак ўйинларда “Навбаҳор” ва ушбу мусобақада юртимиз шарафини ҳимоя қиладиган барча жамоаларга омад ёр бўлишини тилаймиз.
