Бразилия ва Португалия терма жамоасининг собиқ бош мураббийи Луис Фелипе Сколари профессионал футболдаги фаолиятини якунлаганини маълум қилди. 2022 йилнинг май ойида 74 ёшли мутахассис “Атлетико Паранаэнсе”ни бошқарган эди.
“Мен бош мураббий сифатида фаолиятини якунлайман. Пауло Турра клубнинг янги мураббийи бўлади, мен эса "Атлетико Паранаэнсе"нинг техник директори бўламан. Бу менинг ҳаётим эди. Ўйлайманки, мен бу бобни муносиб якунлаяпман. Мен футболда жуда кўп ҳис-туйғуларни бошдан кечирдим", - дея Сколаридан иқтибос келтиради Globo Esporte.
Сколари мураббийлик фаолияти давомида Бразилия ва Португалия терма жамоаларида ишлаган, шунингдек, “Челси”, “Палмейрас”, “Гремио”, “Крузейро” ва бошқа клубларни бошқарган. Шунингдек у "Бунёдкор"даги фаолияти билан ўзбек футболи мухлисларига яхши таниш. Мутахассис раҳбарлигида Бразилия терма жамоаси 2002 йилда жаҳон чемпиони бўлганди.
