Мамлакат XXXI миллий чемпионати ҳам тарих саҳифаларидан жой олди. Йил давомида Суперлига баҳсларига кўникиб қолган мухлислар унинг поёнига етганига ишонишлари қийин. Аммо севимли жамоалари учрашувларини ишқибозлар энди фақатгина келгуси мавсум – 2023 йилнинг баҳоридан кузатиш имкониятига эга бўлишади.
2022 йилги футбол мавсимини кўпчилик турлича талқин этмоқда. Кимдир чемпионат муросасиз, қизиқарли курашларга бой бўлди, деяпти. Буни чемпионлик учун курашнинг охирги тургача ҳал бўлмаганлиги ёки Суперлигада жон сақлаш учун курашган жамоаларнинг ҳар бир ўйинни қизитиб берганлиги билан исботлашмоқда. Баъзиларнинг наздида эса шунчаки аксарият клубларнинг кучи тенглашган, шунинг эвазига кескин рақобат кузатилди. Биз бу фикрларни таҳлил этиш фикридан йироқмиз. Шунчаки қадрдон жамоамиз – “Металлург” сарҳисобига назар ташламоқчимиз. Бекободликлар учун мавсум қандай ўтди? Мухлисларнинг жамоа иштирокидан кўнгли тўлдими? Шу ва бошқа саволларга эса рақамлар мисолида жавоб ахтарамиз.
Ўтган йилига нисбатан ўсиш – бир поғона!
2021 йилги мавсумда бекободлик футбол ишқибозлари чемпионат якунини юрак ҳовучлаб кузатишганди. Боиси жамоа фақатгина охирги турда сафар ғалабаси эвазига хавфли минтақани тарк этган, 11-ўринни эгаллаб, ўтиш баҳсларидан “қутилиб қолганди”. Бу йилги чемпионатнинг биринчи даврасидан кейин “Металлург” яна 11-поғонада борар, Про-лигага тушиб кетиш хавфи ишқибозларимизни хавотирга солганлиги бор гап. Ҳатто энг ашаддий ишқибозларимиз жамоа раҳбариятига натижадан қониқишмаётганини, бир мавсум аввалгидек сўнгги тургача қийналишни истамаслигини очиқча айтишгача боришди. Клуб раҳбарияти эътирозларни ўринсиз қолдирмади. Давралар оралиғида таркибда бир қатор ўзгаришлар амалга оширилди. Жамоага янги, истеъдодли ўйинчилар таклиф қилинди. Мураббийлар штабида жузъий ўзгаришлар бўлди. Август ойи охиридан клуб бошқарувида ҳам янгиланишлар кузатилди. Муассислар жамоа аъзолари билан очиқ мулоқотда клубдан нималарни хохлаётганини очиқ баён этишди. Аниқ вазифалар юкланди. Бу ислоҳотлар эса ўз самарасини бермасдан қолмади. Биринчи даврада сафарда биронта ҳам ғалаба қозонмаган жамоа иккинчи даврада тўртта ютуқни қўлга киритди. Суперлигада мавқеини сақлаб қолиш вазифасини муддатидан олдин уддалади. Фақатгина охирги учта ўйинни бой бериш натижасида кучли олтиталикка кириш имкониятини қўлдан чиқарди. Якунда 10-поғона билан кифояланди. 26 учрашувнинг 8 тасида ғалаба, 8 тасида дуранг қайд этилди. 10 та ўйинда имконият бой берилди. Киритилган ва ўтказиб юборилган тўплар фарқи 19:27, 32 очко жамғарилди. Лигада “Металлург” рақиб дарвозасига энг кам тўп киритган жамоа бўлди. Гол ўтказиб юборишдаги кўрсаткичи эса – 5-ўрин.
Сафарда ҳам уйдагидек...
Юқорида айтиб ўтганимиздек “Металлург” биринчи даврада сафарда биронта ҳам ғалаба қозона олмади. 6 та ўйиннинг учтасида мағлубиятга учраган бўлса яна 3 тасини дуранг билан тугатди. Иккинчи даврада эса меҳмондаги ўйинлар кўрсаткичи кескин яхшиланди. Жамоа тўртта баҳсда 3 очколик бўлди. 3 та ўйинни эса бой берди. Сафарда очко жамғариш бўйича Суперлига жамоалари орасида ижобий кўрсаткич қайд этди.
Бу йилги мавсумда бекободликлар ўз майдонларида кўпроқ очко йўқотишди. 13 та учрашувнинг 4 тасида ютуққа эришган “Металлург” яна шунчасида мағлубият аламини тотиб кўрди. 5 та баҳсда эса рақиблар билан очколарни бўлиб олинди. Киритилган ва ўтказиб юборилган тўплар фарқи ҳам ижобий эмас – 9:11. Қуйидаги тақвимда “Металлург”нинг 2022 йилдаги барча ўйинлари натижалари эътиборингизга ҳавола этилаяпти:
Жамоа гвардиячилари
Бу йилги мавсумда испаниялик мураббийлар штаби асосий таркиб ўйинларида 29 футболчининг хизматига таянишди. Энг кўп майдонга чиққан футболчи Забихилло Ўринбоев бўлди. У 25 та учрашувда асосий таркибда тўп сурди. Аброрбек Тошқўзиев эса 24 та баҳсни асосий таркибда ўтказди. Учинчи кўрсаткич Шаҳзодбек Ғофурбековга тегишли – 23 ўйин. Йигирматалик довондан яна икки нафар вакилимиз – Фаррух Иброҳимов (21 та учрашув) ҳамда Ихтиёр Тошпўлатов (20 та ўйин) ошишди.
Майдонда бўлиш – дақиқалар ҳисобидан келиб чиққанимизда эса пешқадам Аброр Тошқўзиев етакчи. Кейинги натижа Фаррух Иброҳимовга тегишли. Забихилло Ўринбоев эса кучли учталикни якунлади. Футболчиларимизнинг 2022 йилги мавсумдаги улушини қуйида келтирилаётган тақвим орқали ўзингиз таҳлил этиб олишингиз мумкин.
Жамоа тўпурарлари
Суперлигада рақиблар дарвозасига 19 та гол киритган бўлсак, шулардан 18 таси “Металлург” футболчилари ҳисобига ёзилган. Битта автогол қайд этилди. “Динамо” билан уй учрашувида голлардан бири самарқандликлар ҳимоячиси Жасур Жумаевнинг оёғидан дарвоза тўрига бориб тушганлиги сабаб автогол ёзилди.
Қолган 18 та гол эса 9 нафар ўйинчимиз орасида тақсимланди. Жамоамиз тўпурари иккинчи даврадан таркибга келиб қўшилган 20 ёшли Бектемир Абдуманнонов бўлди. У 12 та учрашувда рақиблар дарвозасини 5 марта ишғол этди. Жамоамиз плеймейкери, таянч ярим ҳимоячимиз Дамир Темиров эса 14 та учрашувда 4 та гол муаллифига айланди. Агар Дамир оёғидан жиддий жароҳат олиб, иккинчи даврани тўлиқ ўтказиб юбормаганида албатта бу кўрсаткич янада ижобий бўлиши аниқ эди. Ҳужум чизиғимиз вакили Забихилло Ўринбоев эса ўз ҳисобига 3 та гол ёздириб қўйди. Қолган олти нафар ўйинчимиз эса бир мартадан муваффақият қозонишди.
2022 йилги тўпурарлар:
Бектемир Абдуманнонов – 5 та гол
Дамир Темиров – 4 та гол
Забихилло Ўринбоев – 3та гол
Фаррух Иброҳимов – 1 та гол
Жасур Холтўраев – 1 та гол
Бобурбек Фарҳодов – 1 та гол
Худойшукур Сатторов – 1 та гол
Аброрбек Тошқўзиев – 1 та гол
Шоҳназар Норбеков – 1 та гол
Жасур Жумаев (Динамо С) – 1 та автогол.
Жарималар жафоси
“Металлург” бу йилги мавсумни жуда интизомли ўтказди дейиш қийин. Учрашувни бошқариб борган ҳакамлар бекободлик футболчилар қаршисида 67 марта сариқ карточкани кўтарганликлари фикримиз исботи. Шулардан бир нафари битта учрашувда иккита сариқ карточка олиб, майдондан четлатилганди. Тўғридан тўғри қизил олган футболчиларимиз эса 2 нафар. Улардан бири Шоҳназар Норбеков ўйин пайти майдонда олган бўлса, яна бир нафари Акмал Ортиқов майдонга тушмасидан четлатилган. АброрТошқўзиев эса битта учрашувда иккита сариқ карточка олиб, ўйинни вақтлироқ тугатганлигини ҳам айтиб ўтиш лозим. Ўз навбатида огоҳлантирилганлар орасида бош мураббийимиз Луисма Эрнандес ҳам борлигини қайд этиш керак.
Огоҳлантиришлар:
Фарҳод Бекмуродов – 7 та
Карим Палич – 6 та
Забихилло Ўринбоев – 5 та
Ихтиёр Тошпўлатов – 5 та
Аброрбек Тошқўзиев – 4 та
Иброҳим Ибрагимов – 4 та
Жасур Холтўраев – 4 та
Дамир Темиров – 4 та
Худойшукур Сатторов – 4 та
Александр Лобанов – 4 та
Аббос Отахонов – 3 та
Бектемир Абдуманнонов – 3 та
Фаррух Иброҳимов – 3 та
Саламат Қуттибоев – 3 та
Акмал Ортиқов – 2 та
Анвар Ғофуров – 1 та
Исломбек Исоқжонов – 1 та
Шаҳзодбек Ғофурбеков – 1 та
Бобурбек Фарҳодов – 1 та
Муҳаммадали Алиқулов – 1 та
Эргаш Исмоилов – 1 та
Ўринбосарларда ўсиш бор
Асосий жамоамизга яқин ўринбосарларни етиштириб берувчи U-21 ҳамда U-19 чемпионатларида қатнашган ёшларимизнинг натижаларида ўсиш борлигини кузатишимиз мумкин. Хусусан, Баҳром Умаров етакчилигидаги “Металлург U-21” жамоаси мавсумни 4-ўринда якунлади. Совриндорлар сафига қўшилиш учун озгина омад етишмади. Аммо бир мавсум муқаддам Ўзбекистон биринчилигида аутсайдер бўлган жамоамизнинг кучли тўртликка қайтиши барчамизни хурсанд этмасдан қолмайди. Зеро асосий таркибнинг энг яқин ўринбосарлари мазкур жамоамиз саналади. Бу йил ушбу жамоанинг жуда кўплаб ўйинчилари Луисма Эрнандес бошчилигидаги асосий таркиб машғулотларида қатнашишди. Маҳоратларини оширишди. 20 ёшли Далер Шарипов Суперлигада дебютини ўтказди. Ҳумоюншоҳ Сайётов, Шаҳзоджон Неъматжонов, Миркомил Абдураззоқовлар Ўзбекистон U-20 терма жамоасининг йиғинларидан доимий равишда чақирув олиб туришди. Айтиш мумкинки, улар келгуси йиги ўтказиладиган Осиё чемпионатига Равшан Ҳайдаров бошчилигида пухта тайёргарлик кўришмоқда.
Шуҳрат Юлдашев мураббийлигидаги “Металлург U-19” жамоамизнинг ёш ўйинчилари Самандар Муратбоев, Равшан Хайруллаев ҳамда Рўзибой Файзуллаевлар эса Рауф Инелеев раҳбарлидаги Ўзбекистон U-17 терма жамоаси таркибида хориж йиғинида бўлиб қайтишди.
Шунингдек, “Металлург” ПФК қошида фаолият юритаётган “Эл Голазо” футбол академиямизнинг барча ёш тоифасидаги жамоалари Тошкент шаҳар биринчилигида қатнашиб, маҳоратларини сайқаллаштириб бораётганлиги мухлисларимизни хурсанд этаяпти. Зеро пойтахт чемпионатида кучли жамоалар кўп ва улар билан рақобатда академиямиз тарбияланувчилари йўқолиб қолишмаяпти. Аксинча, “Пахтакор”, “Бунёдкор”, “Локомотив” сингари бой тажрибага эга клублар тарбияланувчиларига қарши ўйинларда тажриба тўпланаяпти. Бу эса клубимизнинг келажагига катта умид кўзи билан қарашимиз учун асосдир.
