Про лига 27-туридан ўрин олган “Машъал” – “Турон” (1:2) учрашувидан кейин меҳмонлар устози Бахтиёр Ашурматов иштирок этди.

Ўйин ҳақида
— “Машъал” жамоаси одатда ҳимоявий, қарши ҳужумларга одатланган футбол намойиш этади. Бу ўйинда ғалаба қозонишимиз муҳим эди. Чунки 2-ўриндан умид узганимиз йўқ. Муваффақият қозониб, интригани сақлаб қолмоқчи эдик. Ўйлайманки, “Хоразм” сўнгги турда “Бухоро” билан жиддий баҳслашади. Биз ҳам вазифани бажариш учун охиригача курашамиз.

Биринчи бўлимда бўш ўйин кўрсатдик. Танаффусда берилган кўрсатмалар, қилинган ўзгаришлар ўз самарасини бериб, ғалаба қозондик. “Машъал” ҳам охиригача курашди. Натижада марказий ҳимоячини майдонга туширдик. Яхшиямки, муборакликлар сўнгги дақиқалардаги вазиятларда фойдалана олмади. Омадимиз келди. Ғалаба қозонган бўлсак-да, ўйиндан қониқиш ҳосил қилмадик. Чунки турнир жадвалида “Бухоро”дан олдинда эдик. Кейинчалик 3-ўринга тушиб қолдик. Бу футбол. Охиригача курашамиз ва вазифани уддасидан чиқишга умид қиламиз. “Андижон”ни ҳам мағлубиятга учратиш учун майдонга тушамиз.

— Абдураимовни захирада олдингиз...
— Тактик ўзгариш сифатида алмаштирдим. “Машъал” билан ўйинда у Аъзам Алиев билан майдонда ажойиб футбол намойиш этди. Сардор жамоамиз етакчиси. Унга ҳеч қандай эътирозим йўқ. Фақатгина ҳисобни сақлаб қолиш учун Абдураимов ўрнига марказий ҳимоячини майдонга чиқардик. Бугун Сардор охирги ўйинлардаги энг яхши баҳсини ўтказди.

Шу ўринда жамоамиз мухлисларига миннатдорчилик билдирамиз. Ноқулай об-ҳаво шароитида ҳам Муборакга келишди ва жамоани қўллаб-қувватлади. Улар учун ҳам ғалаба қозонишимиз керак эди.

— Про лиганинг жорий йилдаги савияси ҳақида қандай фикрдасиз?
— Охирги йилларга  нисбатан қизиқарли бўлди. Мисол учун “Турон” очко йиғин бўйича юқорида эди. Юқори бешликга ажралганидан кейин жамоамиз кўп очко йўқотди. Баҳслар қизғин тарзда кечди. Қолаверса, ПФЛ раҳбарияти саъий-ҳаракатлари билан ўйинлар ТВ орқали олиб берилмоқда. Бу ҳам ўзгаришларнинг самараси бўлди.

— “Турон”даги келажагингиз борасида нима дея оласиз?
— Ҳозирда бор эътиборим олдимизга қўйилган вазифани бажариш. Мен клуб раҳбарияти билан гаплашганимда, мавсум якунига қадар ишлаш бўйича келишгандик. Мавсум якунига етганидан сўнг келажагим борасида яна гаплашиб олишга келишиб олганмиз. Ҳозир бу ҳақда ҳеч нима айта олмайман. Лекин шуни  айта оламанки, “Турон” ўз олдига юқори мақсад қўядиган, режали жамоа ҳисобланади. Раҳбарият инфратузилмани яхшилашга эътибор бермоқда.