"Милан" ва Бразилия терма жамоасининг собиқ ҳужумчиси Алешандро Пато клубини алмаштиришга қарор қилди.
Футболчи "Орландо Сити"ни тарк этишини маълум қилди. 33 ёшли бразилиялик футболчи фаолиятини қаерда давом эттириш борасида ҳали қарорга келмаган.

“Бу менинг қалбимда абадий сақланиб қолган ҳикоя. Мен билан бирга бўлган барча мухлисларга раҳмат. Мен "Орландо" мухлиси бўлиб қоламан", - дея футболчининг сўзларини келтиради Tuttosport.

Пато "Орландо" клубида 2021 йилдан бери тўп суради. МЛСга қадар ҳужумчи "Челси", "Милан", "Вильярреал" клубларида ўйнаган. Шунингдек, у Бразилия терма жамоаси сафида 27 та ўйин ўтказиб, 10 та гол урган.

Бразилиялик футболчи ушбу мавсумда "Орландо" сафида барча турнирларда 27 та ўйинда майдонга тушиб, 4 та гол урди ва 5 та голли узатмани амалга оширди. Transfermarkt порталига кўра футболчининг нархи 1 миллион еврога баҳоланмоқда.