“Барселона” ҳужумчиси Мемфис Депай қишки трансфер ойнаси вақтида каталонияликлар клубини тарк этмоқчи, деб хабар беради Sport.es.
Каталонияликлар футболчининг маошини тежашни, унинг ўзи эса кўпроқ ўйин амалиётига эга бўладиган жамоага қўшилишни истамоқда.
Нидерландиялик футболчига “Манчестер Юнайтед”, “Арсенал” ва “Челси” клублари қизиқиш билдирмоқда, бироқ бу клубларнинг ҳеч бири ҳозирча расмий таклиф билан чиқмаган.
Депайнинг "Барселона" билан шартномаси 2023 йилнинг ёзида якунига етади. Жорий мавсумда 28 ёшли ҳужумчи каталонияликлар сафида 3 та ўйин ўтказиб, 1 та гол уришга эришди.
Transfermarkt маълумотларига кўра, ҳужумчининг нархи 20 миллион еврони ташкил қилади.