Афсонавий футболчи Дэвид Бекхэм "Интер Майами" клубига эгалик қилади. Сўнгги хабарларга кўра, бу жамоа таркиби яна бир супер юлдуз билан тўлдирилиши кутилмоқда. МЛС клуби Лионель Мессини сотиб олиши мумкин. Месси мавсум сўнгида эркин агентга айланади. Аммо у бу ишни нисбатан тезроқ бажариши мумкин. Яъни, Месси қишки трансферлар ойнасида МЛСга йўл олади.

Тахминларга кўра, "Интер Майами" клуби Месси билан бирга унинг собиқ жамоадошлари бўлган Луис Суарес ҳамда Сеск Фабрегасни ҳам таклиф қилиши мумкин. Раҳбарият бу орқали ҳозирда Гонсало Игуаин, Блез Матюиди каби юлдузлар ҳаракат қилаётган таркибида янада юлдузли қилмоқчи. Клуб бош муррабийи бўлган Фил Невилл эса ҳужум учлигида Суарес, Месси ва Фабрегасдан фойдаланишни мақсад қилган.

Дэвид Бекхэм бу билан тўхтаб қолмоқчи эмас. У ҳозирда эркин агентга айланган Криштиану Роналдуни ҳам жалб этишни режалаштирмоқда. Агарда португалиялик Майами жамоасига қўшиладиган бўлса, у Луис Суарес билан тандем ҳосил қилади.
Шу билан биргаликда, "Барселона" юлдузи Серхио Бускетс ҳам "Интер Майами" нишонига айланган. Бускетс келажакда Фабрегас билан ярим ҳимояни эгаллайди. Шундай қилиб, Мессининг МЛСга ўтиш қарори, уни Роналду, Суарес, Бускетс, Фабрегас каби мега юлдузлар билан бирлаштиради. Буни кўриш, футбол мухлислари учун ҳам қизиқ бўлар эди...

ИСМАТОВ Ж.