Австралия терма жамоаси бош мураббийи Грэм Арнольд Жаҳон чемпионати гуруҳ босқичи 3-туридан ўрин олган Данияга қарши ўйин давомида рақибнинг тактикасини билишга муваффақ бўлди.
Учрашувнинг 70-дақиқасида европаликлар устози Каспер Юльманн бирданига икки ўзгаришни амалга оширди. Захирадан майдонга тушган футболчилардан бири Роберт Сков данияликлар етакчиси Кристиан Эриксенга қоғозча берди. Футболчи уни ўқиб кўргач, қоғозни майдонга ташлади.
Австралия терма жамоаси футболчиси Митч Дюк ерда ётган қоғозни олиб, ўз мураббийига етказди. Унда Даниянинг схемасини ўзгартириш ҳақида кўрсатма берилган ҳамда "Ишонинг!" сўзи ёзилганди.
Шундан сўнг "кенгурулар" устози орадан 2 дақиқа ўтиб майдонга икки футболчини туширди ва у ҳам тактикага ўзгартириш киритди.
Эслатиб ўтамиз, Австралия мазкур ўйинда Данияни 1:0 ҳисобида мағлуб этиб, плей-офф босқичига чиқди.
