«Эмполи» дарвозабони Гульельмо Викарио фаолиятини «Рома»да давом эттириши мумкин, дея хабар беради журналист Николо Скира.

Манбага кўра, Рим клуби раҳбарияти кейинги мавсумда ўз сафида Викариони кўришни истамоқда. Transfermarkt 26 ёшли италияликни 12 миллион еврога баҳоламоқда.

А Сериядаги жорий мавсумда Викарио 15 та ўйин ўтказиб, ўз дарвозасидан 19 та гол ўтказиб юборди ва бешта ўйин давомида ўз дарвозаси дахлсизлигини сақлаб қолди.

Дарвозабон ўтган ёздан бери «Эмполи» шарафини ҳимоя қилмоқда. Аввалроқ у «Кальяри», «Венеция» ва «Перуджа» клубларида ҳам ўйнаган.

«Рома» айни дамда Италия чемпионатининг жорий мавсумида 15 турдан кейин 27 очко билан 7-ўринда бормоқда.

Бугунги кунда бу жамоанинг асосий дарвозабони португалиялик Руи Патрисиу ҳисобланади.