"Локомотив" - "Динамо" баҳсига темирйўлчилар ҳар қачонгидан жиддий ҳозирлик кўришди. Бунинг ўзига яраша сабаблари бор эди.

Биринчидан, жамоа Ўзбекистон кубоги 1/4 финалидаги омадсизлик тасодиф эканини исботлаши керак эди. Иккинчидан, "Локомотив" 2006 йилдан буён ўз уйида "асрлон"лар устидан ғалаба қозонолмаётганди. Демак, нохуш анъанага барҳам бериш вақти келганди. Қолаверса, августнинг илк якшанбаси Ўзбекистонда темирйўлчилар куни сифатида нишонланади. "Локомотив" аъзолари ўзига хос тўйга муносиб тўёна ҳозирлашни мақсад қилишган эди. Темирйўлчиларга ғалабадан ортиқ яна қандай совға бўлиши мумкин. Шу маънода "Локо" қандай бўлмасин "Динамо" устидан ғалаба қозонишга мажбур эди.

Учрашув темирйўлчиларнинг ҳужуми билан бошланди ва 3-дақиқадаёқ ҳисоб очилди. Рахматуллаевнинг чиройли тўп оширишидан сўнг Холматов қулай вазиятга чиқиб борди ва дарвоза томон зарба йўллади. Бироқ, тўп дарвоза устунига тегиб майдонга қайтди ва унга ҳаммадан олдин етиб келган Шадрин ўзининг чемпионатдаги қуруқ сериясига нуқта қўйди. Тезкор гол меҳмонларни бироз саросимага солиб қўйди. 12-дақиқада Тўхтахўжаев бош билан йўллаган зарба бироз юқоридан кетди. Аммо, 24-дақиқада у мақсадига эришди. Ушбу вазиятда Юлдошев фаол ўйнаганини таъкидлаш керак. Бердимуродовдан ўтиб кетган ёш футболчини жарима майдонига яқин жойда қўполлик билан тўхтатиб қолишди. Рахматуллаев тўпни жарима майдонига оширди. Иккинчи қаватда Ислом ажойиб ҳаракат қилди ва ҳисобни 2-0га етказди. Шундан кейин "динамо"чилар ҳам бироз жонланди. 26-дақиқада Ерохин томонидан берилган зарбани дарвозабон қайтарди. Орадан кўп ўтмай Отақулов олисдан тепган тўп ҳимоячига тегиб йўналишини ўзгартирди ва анча ҳавфли кўриниш олди. 38-дақиқага келиб Нагаев ўз номини таблога ёздириб қўйди. У 2-3 ҳимоячи орасидан ўтиб кетди ва Жадигеров билан девор усулида ўйнаб, яккама-якка вазиятга чиқиб борди. Буёғига Иванни тўхтатиб қолиш қийин эди ва у ҳисобни қисқартирди. Бироқ, меҳмонларнинг қувончи узоққа чўзилмади. Биринчи бўлимга қўшиб берилган вақтда Шадрин яна бир бор ўзини кўрсатди – 3:1.

2-таймда ўйин суръати бироз пасайди. Шундай бўлса-да мухлислар бир нечта ҳавфли вазиятларга гувоҳ бўлишди. 53-дақиқа: Бойдедаев ўткир бурчакни нишонга олди, аммо дарвозабон ишончли ўйнади. 63-дақиқада Холматов қулай имкониятни бой берди. 72-дақиқада Тожиев Шадринни қулай вазиятга чиқарди. Унинг зарбасидан сўнг тўп дарвоза устуни ёнгинасидан ўтиб кетди. Кейинроқ Зайниддин гол урди, бироқ ҳужумчи офсайдда қолгани боис гол инобатга олинмади. Шу тариқа "Локомотив" ишончли ғалабага эришди ва ўз мавқеини мустаҳкамлади.

"Локомотив" – "Динамо" – 3:1(3:1).
"Локомотив" спорт мажмуаси.

Голлар: А.Шадрин (3, 1:0), И.Тўхтахўжаев (24, 2:0), И.Нагаев (38, 2:1), А.Шадрин (45+1, 3:1)

"Локомотив": П. Бугало (А. Парванов 71), А. Фоменко (З. Тожиев 51), Д. Рахматуллаев, М. Казанков (И. Магдеев 62), Ж. Оганесян, А. Шадрин, А. Холматов, И. Тўхтахўжаев, Б. Йўлдошев, Д. Жабборов, Ш. Шарипов.

"Динамо": А. Мельничук, А. Ерохин, В. Почуев, Ж. Отақулов, Л. Кошелев (С. Мамадалиев 46), А. Жадигеров (С. Сайфиев 85), И. Нагаев, А. Хвостунов, Р. Бердимуродов, И. Бойдедаев, Р. Аҳмедов (О. Новкаров 64).

Огоҳлантиришлар: Ш. Шарипов (42) – А. Ерохин (14), А. Жадигеров (22).

Ҳакамлар: Ҳ. Рўзиев, Ж. Саидов, Р. Серазетдинов, Д. Пислегин.
Назоратчи: А. Попов