“Шўртан”-“Қизилқум” жамоалари ўртасидаги баҳсдан сўнг, ҳар икки жамоа бош мураббийлари ўртасида матбуот анжумани бўлиб ўтди. Анжуманнинг иккинчи қисмида мезбонлар бош мураббийи иштирок этди.

“Иккинчи давранинг дастлабки учрашуви бўлганлиги сабабли, ўйинчилар ҳали тўлиқ бир-бирлари билан тил топишиши осон бўлмади”-дейди “Шўртан” клуби бош мураббийи Эдгар Гесс.

“Шунинг учун, учрашув давомида юзага келтирилган кўплаб хавфли вазиятларни самарали якунлай олмадик. Фақатгина иккинчи бўлимда майдонга янги футболчиларни ташлаганимиз ўз самарасини берди. Чап қанотда Лазиз Убайдуллаев жисмонан толиқиб қолди, ўнг қанотда Ботир Қодирқулов ўз ўйинини топа олмагани учун ҳар икки қанотга тезрок футболчиларни киритдик.”

“Игорь Таран ҳам бугун ўз етакчилик қобилиятини тўлалигича намоён қила олмади. Яхшиямки, янги кучларни майдонга туширганимиз самара берди.

”Жамоага таклиф этилган футболчилар? Биз ҳужум чизиғини кучайтиришга урғу бердик ва иккита ҳужумчи таклиф қилдик. Бежизга ҳужумчи олмадик, чунки, биз иккинчи даврани совринли ўринлар билан якунлашимиз шарт! Фарҳод Тожиев бугун рақиб дарвозасини ишғол эта олмаган бўлса-да, энг муҳими жамоа ўйинига киришиб кетди, футболчилар билан тил топишиб кетди ҳамда ғалабада катта ҳиссаси бўлди. Мегреладзедан ҳам умидимиз катта, лекин унга соғлигини тиклаб олиш учун бироз вақт керак.